溫哥華老友記討論區 - Powered by Discuz! Board

標題: 李渼琦插爆湯洛雯霸道大話精 [打印本頁]

作者: tiffiant 時間: 2012-6-20 06:50 標題: 李渼琦插爆湯洛雯霸道大話精

李渼琦插爆湯洛雯霸道大話精
http://the-sun.on.cc/cnt/entertainment/20120620/00470_001.html

今屆港姐再爆是非罵戰，大熱門湯洛雯慘遭圍插，雖然否認亂扔內衣褲，但昨日卻被最後一個「免Out金牌」的李渼琦公開插霸道，而另一佳麗尤蔭蔭亦踩多腳！
每年港姐未選已充滿是非，今年轉玩「殘酷真人騷」後戰況有增無減，佳麗更公開爆料！早前往英國倫敦拍外景的佳麗為求有得留低，以及爭取直入決賽的三個名額，在這場生死戰中冇情講，其中昨日最後一個直入決賽的李渼琦，未知是否事前已得知坐定粒六，竟於前一日開火插爆同房佳麗、湯鎮業姪女湯洛雯「霸道」，慘被對方恰而受盡委屈！

被指霸道的湯洛雯參選至今是非不絕，雖被視為大熱門，但被指因得到陳百祥（阿叻）偏袒。前日，湯洛雯與其他十三位佳麗於倫敦一個公園拍外景，回應是非時即露出一副可憐相︰「我Daddy唔識阿叻，唔知評判點畀分，大會係公平，我私下都冇同阿叻傾偈，所以唔怕畀人覺得偏袒我。」提到被指亂扔內衣而要保母執手尾，她繼續楚楚可憐地說︰「內衣係大會提供，用完要入落袋還番畀佢哋，冇人同我講過呢個問題，自己嘅嘢Keep得好好。」並揚言已習慣面對是非，會以平常心面對。
擔心被整蠱
雖然湯洛雯否認亂扔內衣，但同房的李渼琦卻挺身而出爆她「講大話」，並訴說被恰︰「第一日都有幫佢執，佢仲特登將濕毛巾扔落我袋度，我叫佢拎番出嚟，佢都有Say Sorry。」她又指湯洛雯霸道，差不多攻佔整間房︰「佢放咗好多嘢喺房，我冇晒自己嘅地方，有啲唔開心！」但不願評價對方，並已向大會投訴，她說︰「我冇喊，只係內心喊！有同大會投訴，唔可以畀佢搞到我唔開心。」

原本同組的兩人因早前自選泳衣環節中勝出，她們要投票送一位佳麗過組，結果揀中李渼琦，但她強調不是自己要求，調組後心情超級開心，說時非常雀躍。對於最後一晚跟湯洛雯同房，李渼琦卻擔心遭對方整蠱，曾想過要求調房：「佢冇整蠱過我，但擔心佢會將我啲衫亂咁扔。之前有想過調房，但都係最後一晚，算啦！我唔想同佢嗌交同打交，佢對我唔好，但我又唔會對佢有嘢！」說畢後獲不少佳麗如卞曉帆等上前攬攬，以示支持。

記者再向湯洛雯求證，她得知被李渼琦插爆後大感愕然︰「佢真係咁講？佢講o架？我冇蝦佢，我平時對佢好好，好似好多嘢都會Share，有時見佢瞓咗都特登唔沖涼，驚嘈醒佢。」她表示對方可能有誤會，並非常委屈地說︰「佢冇同我講任何嘢，我冇蝦佢，大家都好照顧佢！」而李渼琦得悉湯洛雯大叫冤枉及指分享物品後即寸嘴說︰「冇喎！唯一Share係酒店個風筒！」她更踢爆湯洛雯曾在房內飲泣︰「尋日朝早喺個房度喊，我都唔知咩事，冇理佢就走出房。」
喊到眼腫腫
昨日，一班佳麗前往倫敦之旅最後一站白金漢宮外圍拍攝，同時宣布李渼琦繼曾明俐及張名雅後最後一個直入決賽。李渼琦直言非常開心，但提到是否想湯洛雯入圍，她即嘆氣說︰「我知佢好想入圍，我都想全部入圍。」她自爆兩人前晚已分房瞓，並已冇偈傾︰「我都唔想同佢講嘢同嗌交，大會亦冇話我哋叫封口，心情都OK。」另一主角湯洛雯現身時眼腫腫勁憔悴，並承認有喊過︰「到依家都接受唔到佢咁講，大家冇傾偈！調咗房又唔同組，冇乜碰面機會，但想了解有咩誤會。」她表示大會未有找她傾談此事，其他佳麗如陳潔玲等亦有安慰，她自言大個女可以應付，故未有跟家人訴苦。

此外，有人於港姐官網留言指黃心穎是爆料幕後黑手，昨日她聞言大感愕然︰「自己唔會做呢啲嘢，有啲冤枉，我同佳麗個個都好好。」她又指自選淘汰時是揀自己，否認踢走陳華鑫的傳聞。
港姐大起底
爆料熱線：3600 1022

爆料傳真：3600 1000

爆料email：[email protected]

作者: tiffiant 時間: 2012-6-20 06:51