| ~轉貼 TEXT: Cynthia 唔單止減肥會有「平台期」，拍拖都一樣，有無試過拍拖拍到兩三年左右，開始覺得有啲悶，感情停滯不前，究竟你係咪經歷緊「平台期」？不如睇下你有無以下的「平台期」跡象： • 少咗想見對方嘅衝動。 • 兩個人拍拖諗唔到去邊，唔知做咩好。 • 傾電話時間短左，或者有時你想send短訊就算。 • 帶佢出席朋友間聚會，你有時會掛住同朋友傾偈而冷落咗佢。 • 開始留意對方嘅缺點多於優點。 如果以上有3個或以上講中咗你嘅情況，你好可能已經踏入拍拖「平台期」。唔尋求突破，令感情更進一步，下場就只有兩個：一係大家繼續悶住拍拖落去，一係分手收場。唔想咁樣，係時候花多少少心思，為戀情升溫。 1. 短線旅行： 大家有時好忙未必可以安排到去旅行，不如搵返個周末，去下澳門或者大陸，唔使特別plan行程，兩個人relax一下，亦可趁機相處多啲，增進感情。 2. 親自下廚： 拍拖「指定動作」行街睇戲食飯做得太多梗會悶，唔一定下下都去餐廳食飯，主動煮返餐俾對方食，就算好簡單都已經夠窩心。 3. 融入圈子： 多點出席他與朋友和同事間的聚會，當你與他的圈子漸近，認識更多，他平常和你說起朋友或公司的事，你都唔會覺得悶或完全聽唔明，雙方的距離亦會更近。 4. 愛屋及烏： 當感情有一定基礎，會開始認識對方家人，不妨多啲主動關心他的家人，你的付出，代表願意和他繼續發展下去。 5. 製造驚喜： 既然拍拖太悶，就不如主動製造驚喜。唔係要你大灑金錢，始終誠意先係最重要，買佢想睇但好難買嘅Lady Gaga演唱會飛、親手砌佢鍾意嘅模型俾佢，佢一定會愛死你。 6. 適時關心： 男生唔鍾意女友問長問短，但唔代表佢地失意嘅時候唔需要關心。細心留意佢嘅需要，例如當佢喉嚨痛就送上一杯熱檸蜜、佢OT到好夜就主動買宵夜俾佢充飢，一切盡在不言中，你嘅關懷一定會令佢好感動。 不過有樣嘢你一定要知，拍拖遇上「平台期」係好平常嘅事，除左努力經營雙方嘅感情之外，你都要學習接受兩個人相處越耐，拍拖生活會變得和初開始時的激情四射不一樣嘅事實。當然咁亦唔等於感情變淡，只係相處模式去了另一個層次。如果兩人真係相愛，你會發現細水長流嘅感情也可以好幸福。 如果你發現呢個「平台期」之中，即使幾努力都冇改善，感情亦大不如前，可能就要好好審視一下兩個人的關係，究竟仲適唔適合繼續一齊。始終結束一段互相不合的感情，對雙方都係好事。 |
| 歡迎光臨 溫哥華老友記討論區 (http://loyaukee.com/forum/) | Powered by Discuz! 7.2 |