追女仔

samsung

copied & pasted from someone's blog...
just found it quite interesting and lyk might be benefit from it:

講明....我唔係d咩高手, 亦唔係d咩大情聖
我開呢個post, 只係希望分享自己既經驗
亦希望各位可以討論, 甚至講o下自己既經歷
以求集思廣益, 避免在埸各位男士重蹈覆轍

各位, 我相信你地追女既時候都做過以下既野

一開始對一個女仔心動, 你好緊張
可能係你同班同學, 可能係你d fd個fd
好唔簡單, 你用某d方法識到佢
之後同佢講每一句, 你都好小心, 好驚講錯野, 好想保留好印象
好幸苦, 你有佢電話, msn, 開心到不得了
慢慢, 你同佢開始傾o下計, 傾o下學業, 傾o下屋企, 乜都傾
佢有野要搵人幫手, 你一定義不容辭, 飛的去搵佢
有時送d小禮物, send d sms關心o下佢
有時睇o下戲, 行o下街
而佢, 亦久唔久會關心你兩句, 得閒搵o下你

"佢應該都鐘意我既", 你咁諗
你以為, 大家已經發展到差唔多, 可以表白
你諗左好耐, 左度右度, 終於比你諗到點表白
o係一個好浪漫既海邊公園, 你手持鮮花, 同佢講
"可唔可以做我女朋友呀?"

你一心諗住佢點頭就可以黎個緊緊既擁抱
之後再慢步海旁, 真係好鬼死浪漫
點知答案竟然係.....


"我地都係做朋友好d...."

"你係一個好人, 但係...."

"對唔係, 我唔想拍拖住...."

"學業/事業對我黎講太重要喇...."

"你一會搵到個比我好架...."

"我有男朋友架喇...."

"其實我係les架...."


你個心灰到難以形容!!
但都要淡淡應一句

"我明既...."

隨即送佢返屋企, 你再返自己屋企嚎啕大哭
你以為, 佢真係唔想拍拖
你以為, 佢真係想讀好d書, 做好份工
你以為....你諗住....你比好多理由想說服自己

但好奇怪, 轉個頭, 話唔想拍拖o個個女仔就同左個校內萬人迷一齊
話我好人o個個女仔就揀左個我覺得係仆街既男仔
而話想讀書o個個轉眼就日日同佢個新男朋友出去玩通頂
最離譜係, 第二日比你撞到話係les既女仔同個男仔當街kiss!!

其實去到呢個程度, 都幾好架喇
因為有更多既人係追追o下, 對方突然冇左聲氣
明明一日一次電話, 變左一個月都冇一次, 仲要打去冇人聽
更甚者, 可能連電話都未拎到就冇左喇....

漸漸, 呢個女仔從你生命中消失

你以為, 下一個唔會咁既, 一定成功
點知, 結果一樣

到底問題出o係邊?
係咪所有女人都係鐘意壞男人?
點解每次追女仔都係咁失敗?

希望你睇完我既經歷, 你會有所得著....


大家唔好誤會, 我依家有一個好靚, 好叻既女朋友, 差唔多兩年喇
而且身邊從來都唔會缺少女性朋友(唔係一腳幾船o個種"女性朋友"....)
所以, 我呢篇只係分享啦, 唔係我依家既問題 =]

上次岩岩要開始講我自己

其實我細細個既經歷同好多男仔差唔多
大約10年前, 我都仲係一個小毒男
唔敢同人講野, 唔打扮, 鐘意打機, 睇漫畫
小息就o係操場跑黎跑去, 放學就去公園玩"何仔公"
冇女性朋友, 身邊只有一班麻甩佬, 日日如是
連去唱k, 都只係一班男人, 冇女人, 真係男人KTV

但好好彩, 唔記得點解, 我亦從來唔知點解
中三o個年有個女仔鐘意我, 我開始初戀
簡單d講....呢個女仔我冇追過, 就一齊左
但如果唔係呢個女仔, 我諗我有排都開始唔到戀愛

年幾之後分左手
散左之後, 我開始學識送禮物, 甜言蜜語, 對個女仔好咁去追佢
一直都好順利, 個個都work, 之後都拍過幾次拖
呢幾次拖, 改變左我個人既性格
我唔再係完全既毒男
我變得有自信, 識講野, 有某d專長, 讀書都過得去
我以為自己都算ok, 算係識媾女, 算條件幾好

我呢種追女既方法一直都好work, 冇問題
直至前幾年, 開始發現情況有變
我發現keep住以前o個套唔多掂

d所謂甜言蜜語已經冇用, 佢地一眼睇穿
你再對佢好, 送禮物? 人地送LV呀大佬, 我仲送緊公仔
人地有車送佢出出入入, 我搭巴士ja....
當女人開始大, 佢比人媾既經歷多左, 自然識防避
而亦因為女人開始大, 佢地揀男朋友既條件都已經唔同細個
但我忽略左一樣野, 就係女人幾多歲都仲會比某d男人條件吸引到
可恨我當時發現唔到

我追女開始成日失敗
開始追追o下人地冇聲氣, 開始收卡
其實我好唔甘心, 我唔知點解會咁
最大打擊係, 我發現好多身邊既女仔都開始同一d我不敢苟同既男人一齊
一d擺明一腳踏幾船既花心男
一d有錢既矮仔二世祖
一d食軟飯既拖鞋男
我o個時一直都唔覺得自己係毒男
但我發現, 我開始同d毒男一樣, 身邊冇哂女
我開始冇信心
但我係一個非常好勝既人
我知道再咁落去, 我應該打後呢十年都會係咁
我唔甘心!!
於是我開始諗辦法解決呢個問題

以下既野, 我強烈不建議大家跟住做
當係睇一個毒男既經歷就可以架喇
唔好話我教壞你呀 =]

我由初戀開始, 一直以黎都係一個"好人"既角色
依家我, 睇住一種叫"壞人"既角色將我身邊d女一打一打咁媾走
為左了解又好, 點都好, 我開始步向一個我從來冇諗過會接觸既區域....
我作出左一個180度既轉變, 開始令自己變成一個"壞人"....

點解我要做"壞人"?
個情況就好似蝙蝠俠咁
佢一直以黎都想警惡鋤奸, 想贏哂世上既罪犯
但佢第一件事, 唔係去學武, 唔係去搵蝙蝠車
反而係自己特登走去做罪犯
佢咁做, 係想深入, 切身咁了解罪犯既心理同行為
要清楚佢地點解會咁, 先會贏

同樣, 我想贏既, 係呢d情場上所謂既"大贏家"
呢d所謂既"大贏家", 簡單d講, 就係你o係街見到o個d"唔方係好人"既人
拎住支煙, 打扮出眾, 滿口粗口, 成日浦
但偏偏佢身邊d女就幾個幾個咁換
而且, 通常佢身邊d女仔都有幾分姿色
你以為得浦女先會愛上佢地?
但好奇怪, 我發現乖乖女一樣會比某d去浦既男仔吸引

我覺得, 如果我唔試o下做佢地既角色, 我呢一世都好難贏佢地
你叫我安守本份等一個真命天女? 我又唔甘心之後十年都係咁等
可能我本身就有呢種潛在既陰暗面
於是, 我決心改變自己, 變成佢地咁, 了解佢地, 了解女人
但改變之前, 首先我做左兩件事, 確定我既方向

改變前既第一件事, 我先試食煙
點解係呢樣?
因為好多時只要你食煙, 身邊好多人就會對你扣哂分
食煙係象徵我真係肯改變自己去接受一d我未諗過我會做既野
亦代表, 我接受到改變之後人地對我既目光
呢樣係我試一o下到底自己既心理過唔過到要變呢一關
到最後, 我過到
而且食煙比左一樣新體會我
就係你如果未試過, 唔好咁快一口咬定呢樣野係唔好

改變前既第二件事, 落disco
好多"大贏家"都集中o係呢個地方
我可以o係呢個地方觀察o下佢地點媾女, 再plan自己應該點變

我記得第一次落, 我仲係一個毒男look
但呢次既經歷, 比我睇到一個我未睇過既世界
入去之前, 我個fd同我講:
"你呢一世都應該未見過咁多靚女集中o係同一個地方"
果然....睇過之後, 你會知呢個世界既靚女有時真係多過頭
又或者咁講, 有人多過頭, 有人一個都冇

disco入面既人......乜人都有, 呀叔師奶都有
我記得我一落舞池, 前面有一堆靚女
但好快, 我見住我其中一個岩岩識既fd o係我面前用5分鐘就媾到, 仲拖住成堆走左
我見到有人o係舞池度周圍走, 見女就媾, 好多人受媾
我見到有堆女人見到一d好得意既野尖叫
我見到好多pair男女由disco出黎行去時鐘酒店
我見到有一d左右逢源既男人媾緊第三個女人, 可能諗住玩4P
亦有d仔係企o係度都有女去主動媾佢
原來呢個地方, 所謂既"追"就係咁, so simple

成個場唔係一pair pair就一堆堆男女
當然, 都有人呆呆o下咁企o係度
而我就亦係其中一個
呢一晚, 我冇媾女, 都冇比女媾
但我o係場入面, 觀察到好多野

我留意到一d比較受歡迎既男仔
佢地唔一定高, 唔一定好靚仔(有冇錢我唔知)
但一定識打扮, 仲有, 一定可以令佢身邊既女仔不斷笑
我真係好想知道仲有咩令到佢地會咁受歡迎
我問我自己:
"仲要唔要再黎disco?"
好快, 我答到自己:
"要, 下次d女尖叫, 唔係我睇人地, 而係人地睇我!!"

我已經準備好作出一個大改變, 加入呢一個社會既陰暗面

呢篇講o下點變喇....

改變呢樣野, 分外在同內在
外在同內在呢兩樣野係相輔相成
外在反映人既內在, 內在亦需要用外在黎表現出黎

就等於如果你想人地覺得你係籃球員, 你會著籃球波衫一樣
而外在反映你既內在, 所以外在既風格, 同內在既性格一定要match
用返籃球員做例子, 除左著籃球波衫, 你都要識打籃球先得
你要變, 就一定要兩樣一齊變哂
假如變一樣唔變一樣
情況就好似一個人著住籃球波衫但係去踢足球咁, 不倫不類

總之, 最緊要既係岩自己既個性

首先講外在先
外表係比較易變既一樣野
因為通常只要肯落手落腳去做, 點都會見到d成果

由於好難講有咩變左, 因為有d細細個已經有做開
所以我一次過講哂我平時大約係點架啦
我唔係d咩專家, 唔可以話型
但我覺得都正正常常咁啦
我都冇買過d咩名牌, 冇咁多錢 =]

samsung

髮型 - 剪個岩自己既髮型, 成個人個感覺會變左好多
同埋要gel, gel完, 無論個形有冇大變化, 個感覺都會好d

配con - 眼鏡係眼神交流既死敵, 留返屋企用啦
除非搵到一副好型好有格既眼鏡

修毛 - 呢d毛包括任何睇得到既毛 (睇唔到既由佢啦....)
例如兩條眉中間既雜毛, 鼻毛, 面毛等等

耳仔 - 我以前冇諗過我會穿耳, 點知一穿就穿左兩個
仲有要定時定候清潔o下隻耳仔

銻鬚 - 除非個樣係留鬚先好睇, 如果唔係都唔好留
銻之前同銻之後都最好用返d銻鬚用品, 咁對皮膚會好d
特別係d鬚比較粗同難銻既男士, 好似我咁....

護膚 - 我本身皮膚比較好, 都唔太需要點用, 但例如乾燥咁就要搽返d野
仲有d黑頭粉刺久唔久都要搞搞佢唔好由得佢地不斷生出黎

牙 - 刷牙!!!!

嘴唇 - 千萬千萬唔好由佢爆哂拆, 其實好核突架, 搽潤唇用品啦

口氣 - 呢樣係必定唔可以有!!!!如果唔係你再靚仔人地都彈開10尺遠
如果口氣真係太勁既, 香口膠幫到你

上身 - 唔記得幾時開始, 我上身個格定左
夏天: 長袖恤衫
冬天: 西裝褸

指甲 - 記住唔好太長, 長得黎仲要有黑邊既, 比人見到死硬

止汗 - 太大汗既, 點都噴少少止汗劑, 雖然其實我覺得冇咩用....

皮帶 - 唔建議用布料, 可以特別少少都ok

下身 - 牛仔褲

底褲 - 如果著褲既方法係會露到條底既, 條底都唔好太樣衰....

鞋 - converse, vans, 波鞋

袋 - 我多數用側"咩"袋

飾物 - 戒指, 耳環, 頸鏈, 手鏈, 呢d點都唔少得
揀d特別少少既, 唔好太易撞, 亦要有想表現既特色
我自己習慣唔會一次過帶太多上身

膚色 - 唔好過份地白, 如果係既, 去曬黑少少啦

沖涼 - 如果熱既沖多d涼啦, 沖完個人都醒神d自信d
我個人習慣每次出街之前都會沖一次涼先換衫出門口

坐, 企, 行路, 眼神呢d, 如果唔係咁好既, 都要變一變

可以既話, 笑多d =] =]

一時間諗唔起所有野....
如果各位男士有補充不妨提出

雖然依家我久唔久都會轉少少look
但其實個格大致上都係咁

我打出黎唔係想要大家學足哂
我亦都唔係d咩型男可以比大家學
只係想講, 其實好多野唔係買返黎
反而d生活習慣先係最難變

最後都係o個句, 總之, 個look最緊要既係岩自己既個性

呢次外表既改變, 令到連一d平時同我玩開既fd都可以唔認得我
但我諗其實改變最大既....反而係我既內在....
太複雜....我要諗o下點講會好d....

到內在既改變
因為太亂喇, 可能會寫得唔好, 比較難明

內在既改變, 即係心態同行為
呢樣野, 我主要係o係夜埸學既
一直學住黎改, 改住黎學

第二次去夜場, 我個look已經變左
好明顯, 同我有眼神接觸既女性多左好多

由我o個晚媾女, 同睇人地媾女既經驗話我知
呢個地方, 你要"追", 真係超直接, 而且仲好現實
我之後理解到, 其實唔止夜場, 日常生活中"追女仔"本身都係一樣咁現實

夜場入面, 一個男既去聊一個女既傾計
個女既唔需要5秒分分鐘已經out左你

個樣7 - out
唔識著衫 - out
矮過佢 - out
口臭 - out
感覺污糟 - out
好似3日冇訓過咁 - out
講野細聲 - out
講野9唔搭8 - out
講錯野 - out
講野冇事, 但無聊 - out
悶 - out
個樣一睇就知係狗公 - out
兇神惡剎 - out
太言聽計從 - out
死纏 - out
抽水 - out
o係佢後面聊佢 - out
肢體語言奇怪 - out
太被動太cool - out
太主動 - out
"感覺"唔岩 - out
如果佢係好靚女既話, 你根本未埋到身已經比人out左

d女人拒絕既方法都好直接
唔係唔聽你電話, 唔係唔覆sms
而係即刻走人/黑口黑面
再留返我一個自己o係度樣衰

我用左一晚去嘗試, 再了解呢種夜場既遊戲規則
要唔做以上既所有野, 其實都唔易
經過不斷既失敗, o個一晚既後段, 我已經開始唔會再犯以上既大錯
下一步, 我開始增值自己既正面能力
我觀察一d"大贏家"既行為
慢慢, 我領略到一個道理, 一個方向

第三次去夜場
呢一次, 我已經唔會再犯大錯
已經開始有女仔主動聊我
我亦第一次成功媾到女

呢次成功之後, 我無論自信, 技巧, 都好左好多
之後去咁多次, 發生咩事我都唔太記得, 因為太多太亂
我淨係記得之後每次去, 都會媾到女, 亦都有比女媾
我開始掌握到一種短時間內吸引到女人既方法

不過去多幾次夜場, 我又開始諗
次次都要去夜場, 唔多掂, 又要時間, 又要錢
有冇d唔需要去夜場都有女人既地方呢?
我先發現, 原來互聯網既用法, 唔止用黎睇forum....
我開始上網, 或者fd搭fd搭fd
識到好多唔同既女人
我嘗試將我o係夜場掌握到既一套用o係現實生活
結果係, 原來現實生活既"追"比起夜場, 仲要簡單

因為, 如果我可以o係夜場用一兩個鐘成功吸引到一個女人
咁o係現實生活比一個星期我, 我成功既機會一定大好多

我開始學識唔focus落一個女人度
同時, 我不斷充實自己個人
我睇左好多關於女性既心理書籍
亦都學左好多唔同既得意野, 魔術, 睇掌, 星座, 心理測驗....
上至天文, 下至地理, 左至時事, 右至八掛, 乜都要識, 即使未親身做過, 都要有野講
我仲改善左我講野既語氣同聲線, 眼神, 仲有肢體語言, 令自己睇黎更幽默風趣
我設法令自己個人獨立, 有承擔, 諗野深遠獨特, 有框架, 唔易受人影響
呢d野, 我好多係由網頁同書睇返黎, 只要睇多d, 個人諗野自然就會成熟d

我越識多一個女人, 技巧就越好
技巧越好, 就越識得多女人

諗諗o下, 我好似只係做緊一個好多人參與既實驗咁

我已經組織唔返呢段時間見過既人物, 事情, 地點, 時間
o係我個腦入面, 諗返起既都只係一d好零碎既片段
我只係記得我一邊o係夜場, 一邊o係現實生活領悟呢種"追"既技巧
呢段時期我接觸過既女人, 比我之前一生都要多

呢一大堆女人, 教識我好多野
佢地教識我, 原來天下間既女人, 都係一樣
佢地教識我, 原來女人都係口是心非
佢地教識我, 原來拖手, kiss, 都可以唔代表你地係男女朋友
佢地教識我, 原來"愛情", 可以好簡單, 都可以好複雜
佢地教識我, 原來當身邊有幾個女仔, 你會精神錯亂, 然後叫錯名
佢地教識我, 原來性同愛, 係可以完全分開
佢地教識我, 原來我記性唔係咁好, 因為我見返都唔記得上星期同我kiss過既女仔
佢地教識我, 原來女人鐘意一個人, 真係可以唔睇外表
佢地教識我, 原來兩秒既心動, 可以傷心一世
佢地教識我, 原來女人鐘意一個人, 可以不顧一切
佢地教識我, 原來唔係夜場既愛情, 都唔一定真心
佢地教識我, 原來一腳踏兩船, 非常辛苦
佢地教識我, 原來睇住一個女人為自己傷心, 無論你愛唔愛佢, 都係好內疚既事
佢地教識我, 原來女人o係佢自己既保護網底下, 都係好脆弱
佢地教識我, 原來每個女人都好驚再遇上壞男人, 再比人傷害
佢地教識我, 原來壞男人即使再多人愛, 佢都係好寂寞

samsung

炸藥當初發明既時候, 係想這造福人類, 幫人開山劈石
但到最後, 炸藥既主要用途變左戰爭既破壞
人, 永遠會將所有野都應用o係壞既方面
呢種"吸引"既技巧都一樣
雖然我唔係掌握到爐火純青
但當我繼續濫用呢種技巧既時候, 我發現個情況開始失控

到最後呢一大堆女人教識我一樣最重要既野
就係原來, 我既本質, 根本做唔到一個壞人....

原來做一個壞人, 同我想像中好唔同
我初初以為, 身邊一定會有好多女人
我以為咁樣會好開心
但當我去到o個個位, 我先發現個感覺根本完全唔同

o個時我身邊的確有好多女人
但講真, 我冇一個係真係鐘意
因為我根本就冇花過d咩心落去呢d女人度
其實只要不斷換身邊既女人, 總會有一個係我鐘意, 肯用心既
但原來, 我根本就唔敢再專一咁對住一個人
我開始唔知佢地邊個真, 邊個假
而且最重要既係, 我良心過唔到要睇住d女人為我傷心呢關

做呢d壞男人, 你去邊度玩, 識d咩女人唔係重點
要做一個壞男人, 心態先係最重要

如果你可以睇住一個女人為你喊一個月, 你有潛質做壞男人
如果你可以睇住一個女人為你o係條街發癲你依然可以不顧而去, 你有潛質做壞男人
如果你可以睇住一個女人恨你一世, 你有潛質做壞男人
如果你可以睇住一個女人比你呃完都唔知, 仲要好純真咁對住你笑, 你有潛質做壞男人
如果你根本係個冇同情心可言既仆街, 你有潛質做壞男人
但係我真係做唔到
我過唔到自己

原來壞男人最壞既唔係行為
一個男人成日去夜場, 都可以唔係壞男人
同樣, 一個唔落d唔食煙唔飲酒既男人, 都唔一定係好
壞唔壞, 係睇佢個心態
佢想壞既話, 唔落d, 一樣可以媾女, 一樣可以一腳踏幾船
你睇o下旺角銅鑼灣幾多女, 即使唔出街上網一樣有女人

好多男人會同女人講佢唔煙唔酒唔浦
但原來佢個心態根本就壞到盡
我反而覺得, 呢d心態壞既假好人, 先係最壞既壞男人
因為, 女人對佢地根本防不勝防
女士們, 小心

孤獨, 係指你身邊冇人
寂寞, 係指你個心孤獨
身邊越多女人, 我反而越寂寞
唔孤獨, 但係寂寞, 先係最難受

o係我最迷茫既時候, 我停哂同身邊d女人既聯絡
我以為我會變返以前o個個媾唔到女既我
但係, 呢個時候我先發現, 原來呢段時間真係改變左我既本質
我既外觀改變左
我既框架經已定左
我既知識唔會忘記
我既幽默亦唔會消失
雖然因為我已經差唔多冇去夜場, 比我吸引到既女人係少左
但我發現, 依然keep住有女人比我吸引到
因為我既個性, 已經徹底改變

如果你問我有冇後悔做過呢d野
我會答你, 冇
雖然中間對唔住好多人
但呢段時間係我人生既一部份, 唔需要收埋
我依然好多謝呢段時間帶比我既野

好多謝你睇到呢度
希望各位可以o係呢個故事入面, 有所得著

____________________________________________________________________________

我既心路歷程, 大致上已經完左喇

各位男士, 如果你仲係覺得女人鐘意壞男人, 甚至因為咁諗住變壞
我勸你停一停, 諗一諗
因為女人, 唔係鐘意壞男人, 鐘意壞男人亦唔係因為佢地"壞"

假如你叫我用一句野去表達o係呢段時間我領略到既吸引法則
唔係好奇心, 唔係有錢, 唔係靚仔, 唔係幽默, 我會用呢句:

"女人, 會選擇比自己價值高同表現強既男人"

下一次, 我會講o下點樣o係追求既時候, 應用呢條法則

今次係時候分享我既心得喇

女人, 會選擇比自己價值高同表現強既男人
首先可以講o下點解係咁

我之前打左呢篇xanga, 我直接copy過黎啦
d資料係o係一本兩性心理書度睇返黎既(不過唔記得左個書名...)


『如果你可以接受男人跟女人天生下來就有身體結構上的分別，
那麼你也得接受他們天生的思想行為模式亦跟本有差異。

如果達爾文的進化論屬實，
這種差異源於五百萬年前，
我們人類的祖先剛剛走在地面上，
過著補殺野生動物，住在山洞的小型族群生活，
當時的部落，大多只有數十至數百人。

這種生活模式，直至一萬五千年前才有所改變，
耕種技術的出現，讓人類可以更大規劃地定居，
群居的人類開始以千作單位。

數千年前，文字出現，大大改善了人類的文化，
數百年前，蒸氣機的出現，改善了人類的科技，
數十年前，電腦出現，科技的發展已快得失控，
直至現在，我們都住在數百萬，甚至千萬人的城市。

可是細心一算，這些巨變不過發生了一萬五千年，
在這之前的四百八十五萬年，也就是人類歷史的99.7%，
我們的祖先依然過著原始人的生活，
而遺傳基因，根本跟不上科技的步伐。

簡單來說，
雖然你現在正在上網，
剛剛還在吃日本料理，
而上個月才在飛機上到處飛，
但你的遺傳基因，
與住在山洞中飲血茹毛的原始人根本沒有分別！

就因為這些遺傳基因，
以致男人跟女人天生根本就不同，
無論是生理，還是心理。』


男人o個part唔講喇, 直接去女人o個part啦

古代既女人, 天職就係繁殖後代, 照顧後代
所以佢地揀既男人, 一定要令佢地既後代更進步, 而且可以好好生存
女人會選擇做領袖, 有權力, 有地位, 健康, 高大, 強壯, 負責任, 勇敢
有效率, 刻苦, 有耐性, 知多識廣, 自信, 有原則, 會爭取, 唔易受人控制, 果斷, 機智等等....既男人
原因好簡單, 因為呢d男人可以提供健康既精子比佢, 令佢地有健康既後代
而且呢d男人亦有保護同照顧佢同後代既能力, 食物, 同責任心
呢d基因, 到今時今日到依然o係女性既體內, 潛意識咁令女人愛上呢種男人
當然, 每個女既價值觀都唔同
所以每個女人揀男人時對呢d條件既比重都唔同
例如有女人會用一半既比例放o係一個男人有唔有錢
有女人會用一半放o係佢有冇自信
不過其實, 你有大部份呢d條件一定冇衰

我所講既所謂價值高同表現強, 就係呢d條件
例如有財力, 有地位, 健康, 有責任心, 幽默, 聰明機智等等, 基本上同古代只係有少少分別
有d好明顯係價值, 例如有錢
有d好明顯係能力, 例如有效率
有d係唔明顯分別到既, 例如智慧咁
不過總之都係以上既條件

好多人依家會問:
咁點解咁多有錢仔媾唔到女?
點解咁多有耐性既男人又媾唔到女?
點解細心既男人又媾唔到女?

第一, 得一樣條件係唔夠架
就好似你得細心, 但又唔醒目又唔識講野又冇耐性又內向外表又污糟, 你係女人你點睇?
所以我都話第一步係首先要改善自己既外在同內在, 先唔會治標不治本

第二, 好多時, 男人o係一個女人面前, 即使本來自己價值幾高都好,
一到追既時候, 佢都會做左一d野令自己價值即時趺到谷底
有d咩例子?
我用返隔離"袁彌明"個post既4個point講一講
[個人愛情問題] [轉貼膠登]袁彌明
_________________________________________________________________________

1 ） 令 女 人 認 為 你 不 是 做 大 事 的 男 人
好明顯, 你做唔到大事, 就冇錢, 價值自然低
即使你依家冇錢, 都要有變成有錢人既野心同能力
雖然價值高唔過依家有錢既人, 但女人會睇到你既潛力, 你既價值唔會變得太低

2 ） 太 早 表 明 心 跡
你一早表明心意, 就等於同佢講"我比你外表吸引到, 依家好需要你呀"
一個係被需要既人, 一個係需要人既人
被需要既人, 價值自然提高, 而需要人既人, 價值自然降低
一升一降, 你已經跌到唔知去左邊
加上你仲要只係鐘意佢外表, 咁膚淺既原因會令你價值再下降

3 ） 蜜 蜂 舔 蜜 糖
基本上同太早表明心跡一樣, 就係你同佢講左你需要佢多過佢需要你
呢個仲衰, 你一日到黑痴住佢, 佢直情會覺得你冇左佢會死一樣
就好似你既世界就係得佢一個女人比你揀咁
呢個係好一個好弱既表現黎架
佢會開心, 因為有個傻仔好重視佢
但係, 傻仔就就傻仔, 女人一定唔會揀呢d人

4 ） 每 事 問
男人可能覺得咁係細心, 但其實唔係
例子係咁;
上司叫下屬做野, 唔會問佢意見, 只會叫佢做
反而下屬幫上司做野, 先會問個上司既意見
當然呢個例子太極端, 但其實情況大同小異
你o下o下問佢, 你越問一句, 就越將佢既價值提高, 將你自己價值下降
有時d野, 男人可以決定就決定左佢啦, 女人反而想要一個有決定能力既男人

仲有一個point我自己加啦
5) 無條件幫佢做野
好多男人覺得咁樣佢會感動
但你諗o下, 咩人會幫你無條件做野?
答案係, 工人
工人幫你做野都有條件啦, 你竟然可以冇條件幫佢做野
咁你覺得你既價值o係佢心目中會去到邊
即使真係感動到佢, 都係"感動"only, 唔係吸引, 呢段感情keep唔耐

男人要識拒絕, 特別係追求時, 女人無理既要求
你無條件幫佢做野, 佢會開心, 因為你屈服o係佢既氣勢之下
但開心還開心, 呢種開心唔會令佢愛上你
女人會覺得, 如果連佢你都唔敢拒絕, 咁點肯定將來有事既時候你會挻身而出保護佢
女人, 總係希望搵一個強者好過一個比佢弱既小男人

samsung

你有價值, 都要識表現, 唔好表現到好弱, 你表現得弱, 價值只會隨之而下降
相反, 你有表現強, 但原來你乜價值都冇, 其實又係冇用

點解女人都鐘意壞男人?
其實佢地唔係鐘意"壞"既男人, 佢地係鐘意"強"既男人
不過個事實係, 好多壞男人表現都好強, 同樣好多強既男人, 好易變壞
壞男人聰明, 大膽, 自信, 幽默, 自我框架強, 識拒絕, 多女人選擇
女人天生就係會愛上有呢d特質既男人
男人唔係用好壞黎分, 只會用強弱黎分

追女仔, 你成個過程既價值一定要高, 至少都要等於佢, 唔好低過佢

其實一個女仔由第一眼見到你開始, 已經幫你比緊分
佢會睇o下你既價值高唔高得過/有冇潛力高得過自己, 高過既, 先會揀


所以追女仔, 第一件事係....搵個方法識左佢先
(其實識佢既方法都可以表現你價值高)

岩岩識你, 女人會認為自己既價值高過你, 因為係你主動識佢
(除非你地係o係d必然會認識既情況下認識, 例如同班同學)
所以識左佢之後, 你一定要即時表現你既價值同能力
話比佢聽, 你係一個高價值同能力強既男人
如果個女仔本身係價值好高(即係靚女), 佢本身就會以為佢既價值一定高你好多
咁你除左要表現更高既價值, 仲要要搵方法話比佢聽你並唔覺得佢價值高,
更可以特登搵野降低佢既自我價值, 令佢都覺得自己o係你心目中價值低左

如果你表現得好, 女人自然會對你有興趣, 放你o係可選擇之列
佢對你既"好奇心"就會出黎, 你成功做左吸引佢既第一步

呢個時候, 女人會想知多d你既野, 例如背景, 興趣
興此同時, 佢地亦會做一d"測試", 去試o下你既價值係咪一直都咁高
例如提出一d過份d既要求, 要你三更半夜送外賣, 要你幫佢無條件做野等等
你要識處理呢d要求, 處理得好, 應做既做, 唔應做既拒絕, 你既價值會加分
但如果處理得唔好....例如佢一叫你就仆到去做, 表現弱, 咁就會扣分
好多男仔就係....本身個人既價值唔低
到個女仔對佢有興趣, 做出呢d測試
點知一試, 佢就仆到去應承, 完全唔識拒絕
所以到最後, 佢無論幫個女仔做左幾多, 個女仔都係轉個頭就揀左第二個, 而佢自己就做左兵
呢d例子比比皆是

你成功吸引佢之後, 要同佢平起平坐, 發展一個互動既關係
你唔可以永遠太強, 咁會太遙不可及
你亦唔可以太弱, 令佢覺得你之前既"強"只係虛火
o係咁既環境下進行互動, 即係所謂既"曖昧"
呢個時候, 基本上可以由得佢順其自然, 你唔需要點追, 自然都會一齊.

ricrick

發顛架？甘長點讀？你個毒男日日睇D咁既野，低你溝吾到女！

Ultraman

Gimme some time, I'll reply you next year.

hpyung

I read up to
"孤獨, 係指你身邊冇人
寂寞, 係指你個心孤獨"
and then i lost interest in reading lu ..

ravemother

anyone has a summary?

samsung

原帖由 ravemother 於 2009-1-21 21:16 發表
anyone has a summary?

夜場入面, 一個男既去聊一個女既傾計
個女既唔需要5秒分分鐘已經out左你

個樣7 - out
唔識著衫 - out
矮過佢 - out
口臭 - out
感覺污糟 - out
好似3日冇訓過咁 - out
講野細聲 - out
講野9唔搭8 - out
講錯野 - out
講野冇事, 但無聊 - out
悶 - out
個樣一睇就知係狗公 - out
兇神惡剎 - out
太言聽計從 - out
死纏 - out
抽水 - out
o係佢後面聊佢 - out
肢體語言奇怪 - out
太被動太cool - out
太主動 - out
"感覺"唔岩 - out
如果佢係好靚女既話, 你根本未埋到身已經比人out左

呢度已經有用喇

bluemoon

finished reading...

my own experiences are...  唔需要點追, 自然都會一齊...   were liked this a few times...

those ones that needs to 追, always fail...   not sure why..    well.. i dont know how to 追 anyway...