大家好。
今個禮拜返嚟同大家講個故仔。唔再數臭男人唔再講女人的弱點﹐講一個好緊要又好老生常談嘅男女關係題目 - 色與情。
話說"小妹"係一個廾幾歲嘅女仔﹐佢樣貌標緻﹐高﹐並有一對修長美腿。幾年前﹐好意外地同一個年紀比佢大十多年嘅成熟男﹐"賀生"﹐開始拍拖。老實講﹐第一次見到賀生我都嚇一跳﹐因為小妹之前個男友都算有型有款﹐呢位賀生係一個長頭髮﹐但頭髮稀疏﹐中間肥胖﹐不修編幅﹐望落比真實年齡大嘅麻甩lu。你哋可能會諗﹐一個後生女同一個咁嘅男人一齊無非都係為左錢。但係賀生竟然係一個貨車司機。
賀生除左渣車之外﹐都會幫屋企生意﹐屋企人有一間餐廳﹐都算係太子爺。我同一班朋友每次見到小妹同賀生都只有你眼望我眼﹐老實講﹐我哋點會覺得兩個人會last呀。查實小妹曾經都坦白承認﹐其他人一定覺得佢同一個年紀大又唔係好有成就嘅人拍拖好怪。小妹話﹐賀生真係對佢好好﹐又俾到一份穩重同安全感佢啵。我哋聽就係咁聽啦﹐當時大C姐我都覺得小妹只係當賀生一個水泡﹐囉翻D自信心唧。但係好意外地﹐一年又一年﹐佢哋都住埋三四年。而且喺朋友間都認定佢哋打風都打唔甩。
追近﹐小妹同幾個好朋友傾密計﹐話佢同賀生好耐都無行埋。兩個人雖然感情穩定﹐無咩唉拾﹐但係兩個人變到好似屋企人多過似情侶。其實拍拖拍得耐﹐好多時熱情都會減﹐幾鍾意都好難一見面就有衝動攬攬抱抱。但係不竟小妹都未夠30﹐賀生就已經四張嘢﹐小妹有時都想再有一兩場passionate sex﹐但係望住隔離個蛋散又唔郁﹐都唔知點好。
感情去到呢個位﹐有感情﹐無熱情﹐應該繼續同呢個人一齊希望細水長留﹐定係豁出去試吓尋找一段轟轟烈烈嘅愛情?
-- 夜生活女王 |
發表於 2009-2-7 15:08
| 
