揞名爆「花癡」扮晒上菜

邊個係「花癡」？？

「花癡」恨嫁幾乎已經成為公開嘅秘密，事關佢見到心水目標時嗰種猴擒法，唔單止嚇走咗個目標，連佢自己身邊啲朋友都覺得佢人如其名，見到男人就發晒花癡。
最好笑係佢自身都難保，仲要扮晒嘢，教其他女仔點樣釣金龜喎。真係識嘅就笑死，唔識佢嘅就真係以為佢有料到。

有個平時都有同「花癡」蒲開嘅電視台姐仔同媽咪姐講，話「花癡」到依家仲要扮晒上菜。咩意思？
姐仔邊笑到喘氣邊話：「佢扮晒大家姐咁同我哋講，第一次同男人約會，最緊要睇吓對方開咩酒喎，如果開普通餐酒，就無謂嘥時間，一字記之：閃；如果開啲有年份嘅紅酒嘅，就要好好招呼佢咁話。」嘩，呢啲咁嘅碎料，媽咪姐都有得出賣啦！依家啲妹妹仔精甩尾，使唔使佢教呀！嗱，其實「花癡」都係得把口啫，媽咪姐夠膽話今時今日嘅佢，就算個男人開孖蒸佢都一樣仆埋去啦，仲扮乜嘢上菜吖！