食環署無人性 趕絕雞蛋仔阿伯 香港

Lik

http://the-sun.on.cc/cnt/news/20110411/00405_001.html

冷血食環署趕絕老小販！以「炭燒雞蛋仔」養活全家的阿伯，在銅鑼灣以「走鬼檔」擺賣逾二十年，他長期遭食環署人員票控及充公搵食工具，導致血本無歸，但依然逆來順受，最近更被玩針對，昨日他未開爐已被冚檔，四十日內遭第七次檢控。街坊目睹代抱不平，群起指摘食署冷血，認為扼殺香港特色街頭小食，且質疑他們選擇性執法，一度群情洶湧，大批警員到場控制場面，最終老小販仍難逃被檢控及帶署，其後他獲象徵式以二十元保釋。

「雞蛋仔阿伯」姓吳（七十四歲），報稱居住信德街的後巷木屋，逾二十年來在銅鑼灣道一間茶餐廳對開擺檔，每天推車仔擺賣四個小時，由於用炭燒烘雞蛋仔風味特佳，且同類美食「買少見少」，吳伯已成為區內知名人物。惟自上月開始，吳伯疑被食環署玩針對，幾乎每周一控，遭罰款兼沒收車仔等搵食工具，至本月食環署更變本加厲，十日內三度作出檢控。
選擇性執法百人斥惡行

昨晨十一時許，吳伯如常到老地方擺檔，但未開始做生意，即有九名食環署人員乘車到場包圍他，表示要檢控。茶餐廳負責人卓先生稱，他見一班人欺負手無縛雞之力的吳伯，立即走出查看，獲悉事件後，認為食環署不近人情及涼薄，禁不住出言怒罵，近百名街坊聞訊趕至，齊聲斥責食環署惡行，群情洶湧。

其中街坊郭太質疑今次屬於選擇性執法，針對吳伯。她指現場附近亦有其他無牌小販擺賣，着食環署人員前往執法，但未見有人採取行動，令她更加氣憤。

街坊洪小姐亦稱：「七十幾歲阿伯為搵兩餐，做咗幾十年，又冇攞綜援，雞蛋仔做得又好食，你哋檢控佢，個個聽到都心痛啦！」有街坊亦指炭燒雞蛋仔為傳統香港特色街頭小食，趕絕其生存空間實在可惜。
六輛警車大陣仗控場面

食環署人員擔心場面失控，報警求助，六輛警車近三十名警員以及十多名食環署人員增援，到場控制人群，期間街坊透過警員向食環署人員求情，要求即使檢控吳伯，亦應發還其搵食「架生」，以免令他陷入絕境，惜遭拒絕。擾攘個多小時後，警員無奈地讓食環署人員將吳伯連人及搵食工具帶走，事後他獲「格外開恩」，以二十元自簽保釋。

食環署發言人回應時否認選擇性執法，指行動是合理地行使權力。該署人員採取執法行動前，已明確向有關小販指他在街上無牌販賣熟食，為保障食物和環境衞生，須即時拘控而不先作口頭警告。


多名食環署人員到場包圍吳伯，街坊睇唔過眼。


當正重犯


坐車帶走


充公架生


群情洶湧


近百名街坊不滿食環署人員針對年老小販。

Lik

http://the-sun.on.cc/cnt/news/20110411/00407_002.html

我自食其力唔想攞綜援

【本報記者】「雞蛋仔阿伯」因年逾古稀，已無法找到工作，但要養妻活兒，政府又不再發出小販牌照，只好繼續做無牌「走鬼小販」。他無奈地說：「明知係唔啱，為咗搵食冇辦法喇！……我都係自食其力，唔想攞綜援！」

吳伯表示，他是廣東海豐人，幾十年來一直蝸居後巷的木屋生活，直至晚年才回鄉娶妻育兒，目前育有一女兩子（十五至十八歲），現仍在求學。以前他每月回鄉一次探望妻兒，近年妻兒間中會來港團聚，他才減少回鄉。吳伯表示，他做的炭燒雞蛋仔特別香，主要是用料足，平日賣二十至三十底，會落六十隻雞蛋，假日則可賣一百底，會用上一百五十隻雞蛋。每底雞蛋仔賣十元，每月收入僅六至七千元，但他寧願自食其力，也不願申領綜援。由於天熱時生意較差，他會執拾紙皮及廢鐵幫補收入。
每次罰款八百

對於接連被食環署檢控，吳伯亦無言以對，「唔知發生乜嘢事」，只希望可取回搵食工具。吳伯指每次罰款八百元，加上重製「架生」要二千多元，明知損失慘重，但為生活也要繼續做小販。

昨日吳伯自簽保釋後，隨即返回被捕現場習慣打躉的茶餐廳，兩名兒女已在場等候，兒子更拍其肩膊以示支持。吳伯感老懷安慰，激動流下熱淚，但為免被兒女發現，即刻用手抹掉，然後與兒女回家。


吳伯手持告票大感無奈。


吳伯居住後巷木屋，境況堪憐。

Lik

食環署呢班友賤就不漏都知，而以前專門針對老弱小販嘅個案亦大有前科。連矮仔偉套賀歲片裡面都有大把咁樣嘅情節來諷刺呢班城管上身嘅食環署廢柴就可想而知佢地有幾不堪。

-力

Lik

Lik

如果食環處班城管係全部小販都一律照拉嘅話，好，我無野講！但家陣好明顯係呢班賤人專門蝦阿伯，其他後生果啲就一係唔拉，一係就淨係趕，但阿伯就要一個禮拜拉三次。咁又算係點呢？而且唔好話佢淨係搞無牌果啲，之前有個有牌嘅流動雪糕小販佢亦一樣搵啲芝麻綠豆嘅野去搞佢。

其實講到尾亦要 diu 埋特衰政府，因為流動小販唔再發牌嘅政策係政府定，但佢定咗之後又無安排相關嘅對策去鼓勵同安置之前一班做開流動小販來養活自己一家幾口嘅基層人士。

細個果陣我記得屋企果頭、油尖旺、甚至唔係好熟嘅港島周圍都有好多流動小販做生意。試問六七八十年代成長嘅一班地度香港人有邊個無同流動小販買過野？人地都係為咗自食其力去搵兩餐，又唔係做埋啲乜野偷呃拐騙嘅事，你食環處班城管做乜要咁折墮去趕絕人、斷人米路？呢啲唔係賤，仲可以係乜野？！作為一個人應該有嘅惻隱之心又去咗邊？

-力

Lik

如果d 無牌熟食小販賣o既食物令到d 人食物中毒,d人又會話食環署巡查得唔夠多,拉唔哂d 小販
點做都係會被人 ...
auyatyat 發表於 2011-4-11 17:34

如果個小販檔啲野食真係有問題嘅話，老早就俾啲街坊鬧臭咗啦，仲邊有訂企呢？呢啲小本經營嘅小販檔，做嘅係街坊生意，最緊要係講口碑㗎嘛。

阿auyatyat你其實有無食過街邊檔啲熟食㗎？個檔口有幾邋遢，唔多唔少都有樣睇㗎嘛。咪以為人地係無牌熟食小販，啲野食就一定唔乾淨先得㗎...

-力

Lik

講到尾，呢期港府民望插水，市民見一有位就圍插，都係一種唔平衡嘅破壞心態，認真唔值得鼓勵。社會嘅問題並唔係一朝一夕嘅，要解決同改善係要用時間同耐性加埋有計劃嘅積極行動。唔係响個網度鬧下鬧下就可以改變世界。
FiChai 發表於 2011-4-11 21:47

你都識得講社會問題唔係一朝一夕醞釀出來，亦即係話其實啲問題積埋積埋積咗好耐，但個廢柴政府卻一直唔理，所以民怨先至谷到去臨界點、政府民望先至低處未算低。家陣啲人唔係叫政府唔做野，反之係叫極政府做野佢都懶懶閒唔去做呀，大佬！好喇，到到多少能力嘅立法會議員提案去做野嘅時候，班保皇契弟同一眾功能組別議員又奉旨攪淋你個議案，令到佢無法通過。

你估啲人又好想日日走去diu柒個特衰政府咩？你特衰政府有前港英政府三成能力嘅話，個個香港人早就走咗去搵真銀啦？仲得閒去遊行、抗議、搞衝擊lu喎？

-力

Lik

唔好以爲唔攞綜緩就好有型好有骨氣，但嗰頭就走去做啲遺反法律同擾亂社會秩序嘅事。如果佢行得正企得正咁自食其力又唔靠人先值得他人尊敬！係咪窮同老就可以亂黎？不過可惜長者優惠未去到咁囉。
FiChai 發表於 2011-4-11 23:53

每一輩嘅人有佢自己一套價值觀同尊嚴，就好似有好多上一輩嘅老人家覺得如果自己有仔有女，但卻俾子女送咗去老人院住係一件羞家嘅事、係子女不孝一樣。如果FiChai 兄你老豆老母係咁諗，但你老哥卻硬係要送佢地兩老入老人院，咁你就真係不孝喇。

同一道理，老一輩嘅人一般都認為如果自己仲行得走得，但卻要走去攤大手板問政府攞綜緩係一件仲折墮過做乞兒嘅事。片中睇到吳伯，身體似乎都都尚算硬淨，任何人如果夾硬逼佢去攞綜緩，咁就好應該喇？你講得出一句「遺反法律同擾亂社會秩序」咁嚴重嘅指控，我又唔信你樣樣循規蹈矩，揸車50唔超速、freeway 80行到足呀？

第一，從陰謀論嘅角度睇，好有可能係班英國鬼特登做到收買人心，之後交番個場俾中共就睇佢點死。不過其實之前响班英國鬼嘅統治下又唔見得萬衆歡騰，咪一樣有各樣民怨。
第二，你可以試吓去做官，咁咪唔駛日日响處鬧，不過會唔會日日俾番人鬧就唔知勒。
FiChai 發表於 2011-4-12 00:10

既然你自己都識得講係陰謀論，咁我亦都唔需要再多講啲咩。不過不用致疑嘅就係，港英年代雖然未能做到萬衆歡騰，但 70年代卻係香港經濟開始起飛之時，而 roaring 80's 就更加係香港嘅黃金年代，打工仔年年有十幾廿個％人工加。今時今日嘅香港又能否做到？民怨當年唔係無，但又有無今日咁大檸樂？

換咗我去做官嘅話，我唔敢話我會做得超級好，但卻可以好肯定咁講句我唔會好似班狗官做得咁撚差、咁撚戇車！從唐唐無啦啦走出來鬧爆啲80後、到震英哥走去擦鄧老爺攞和平獎嘅鞋、再到鬍鬚曾份天怒人怨嘅財政預算案，每一件事其實只要稍為對民意有多少了解嘅話，根本都唔會搞到好似今日一pat屎咁。

-力

Lik

但係唔代表唔攤大手就可以理直氣壯去打劫。所以我話要行得正企得正咁自食其力又唔靠人先值得他人尊敬。你唔係唔明箇中分別吓嘛？
FiChai 發表於 2011-4-12 16:28

吳伯話晒都係自食其力，賣雞蛋仔又唔係賣忽得、K仔，咁又點樣唔算係行得正企得正呢？自己贊到錢得來，街坊又有好野食，咁點解唔值得人尊敬、尊重？

無錯，佢做街邊檔係無牌㗎喇，但無牌小返又點解變到好似十惡不赦，要一個星期選擇性執法咁來票控三次呢，仲要沒收埋人地阿伯嘅搵食架生？點解見報果日連檔都未開就要俾人拉？

換咗係你俾阿 sir周到你開快車，你點都會同個阿 sir講兩嘴，叫佢放你一馬掛？但當個阿 sir係擺面玩針對，個個飛車友都唔捉，但就淨係一個星期捉你三次 50 zone行 60，票控之餘仲要充公埋你架車，咁唔知 FiChai兄你又會點睇呢？

今時今日嘅特區政府，又何只係人在江湖咁少野？眼睛雪亮嘅人都睇得出佢老大早就已經放啤晒來做，返工就等收工，少做就少錯。而老曾就直情一早已經做咗離岸特首唔知幾耐啦？又話做好呢份工、又話要起錨，結果家陣咪等咬糧、變超錯囉！

-力

Lik

依你嘅偉論，既然亞伯响不准擺賣既地方兼無牌販賣都咁理直氣壯，即係响禁煙區可以食煙、咸濕書可以賣俾十二歲學生哥、男人可以入女廁、差人可以唔捉賊....，因為佢哋全部都有苦衷得黎又唔係十惡不赦。其實一句講哂，根本法律就係多舊魚，市民應該鍾意點就點。唔怪之得你話如果你做官就包保冇人鬧啦，因為到時香港都變成天堂咯，天堂又點會有人呢！
FiChai 發表於 2011-4-12 22:27

FiChai兄你要多狗餘咁去打橫來講，咁仲有乜野須要繼續傾落去呢？

-力