竊竊C語之C姐講鬼故 星光大道, 外星人, 郭可盈, 二奶, echo

大C姐

嚟到天寒地凍嘅萬性節﹐除左攬住隔嚟果件"衣泣"﹐就緊係講鬼故啦。

其實嚴格D講﹐我係想講兩單近日發生嘅靈異事件... (燈光校暗﹐落echo) 首先﹐我想講做左其個月嘅<超級巨星>同<亞洲星光大道>。呢班10幾20歲o靚妹o靚仔air time多過爭緊視后嘅袁詠儀同郭可盈。明明以為做到最終段﹐但係二奶台諗到無嘢好諗﹐揾均大江南北請D茄哩啡上去又PK﹐又模仿大賽。對面大婆台見人哋未有準備殺科﹐又好似要鬥做得耐加個借屍回魂復活戰﹐擺到明長拖長有。呢一招疑似翻炒當年今日睇真D解剖外星人。以呢個勢嚟睇﹐呢兩個節目起碼做到下年年中﹐超級巨星大戰miss chan chan。

第二件事真係有少少靈異。話說岩岩香港返嚟渣車經過Davie Street﹐竟然俾我發現一間KFC。我諗我有幾年無喺Vancouver見過有KFC﹐香港過D都執得就執﹐邊晒做元祿﹐元氣﹐元人... 我唔知過個location係咪新啦﹐我好少行果邊所以無留意。但係我想講﹐打從80年代尾90年代初我已經好少食KFC。大家仲記唔記得當年香港流傳過一個傳說﹐話KFC嘅"炸雞"係老鼠做。當時真係好多人信以為真﹐KFC生意即時跌到BA BA聲。但係其實以前鍾意去KFC係鍾意食個薯蓉﹐你喺香港唔係去到大酒店大西餐廳當年其實係好難揾到mash potato。但係反而嚟到Vancouver係好多地方都無﹐得potato salad。

講開urban legend﹐其實仲有好多。有機會講埋銅鑼灣狐仙現身﹐大埔猛鬼橋﹐午餐肉有手指等等...

Happy Halloween,
鬼魅兆魂大C姐

大C姐

本來唔係真係想講鬼﹐但係見大家咁想聽﹐我又不防講多個啦。

話說灣仔某卡啦OK(落Basement果間﹐唔開名)﹐好猛。不時透過門上面塊玻璃見到一D"吉房"裡面有人唱歌跳舞。話說有一次有班男仔去飲酒﹐去廁所途中"裝"到其中一間房裡面有一個女仔好似high左嘢自己一個人跳舞。個男仔之後同其他朋友諗住入去搭訕﹐但係一開門個女仔唔見左。

不過講開KFC﹐除左老鼠雞自外﹐仲成日傳D"雞"係變種雞﹐無頭無腳。但係我想講﹐如果KFC科研咁勁﹐就唔洗做快餐啦。


-- 繼續鬼魅大C姐

大C姐

当笑话咁嚟聽，根本都唔当一会事！当時电視台都有到現場拍過，得出结論係啲人太有想像力！
CWong 發表於 2009-10-31 00:38

我覺得好似獅子山同望夫石﹐你覺得似咪係囉...

不過又講開電視台﹐當年關於五台山嘅鬼故都唔少。關於當地風水問題亦廣泛流傳。不過好多人唔知﹐時至今日﹐TXB搬到去將軍澳都不時有鬧鬼傳聞。有某位有陰陽眼嘅藝員透露過(非常可靠)﹐16廠出面個男休息室有好多靈體聚集。如果有朋友係果間電視台嘅工作人員不仿問一問證實。

-- 靈婆C

大C姐

爭D唔記得講地鐵靈異事件。

第一件係某一個站月台上面發生。當年轟動一時﹐因為車長同月台上面其他乘客都目擊一位少女向住埋緊站嘅地鐵跳軌。車長即刻煞制﹐亦有人即刻叫救護車同消防員救人。點知所有人去到月台唔見有傷者﹐起初以為少女捲入車底﹐但係擾釀個幾小時都揾唔到血跡或屍體......

-- 嚇餐矇大C姐