宗教，道德，與人生觀 － 大C姐心靈分享 宗教

大C姐

大C姐呢個人物／形象大家或多或少都有認識，大概對我已經有一個鮮明嘅印象。先開中名義我係一個無神論者，我對宗教從細到大都冇咩大分別，但係亦曾經動搖過。

對我嚟講，宗教係絕對有價值，尤其係以前社會唔係太文明嘅時候，宗教係一個道德標準，一個法律以外嘅建制去guide里民做一啲社會覺得合理同可以接受嘅事。例如教人唔好淫人妻，偷扼拐騙，妒忌同陷害人等等。唔同宗教會勸告里民做＂壞事＂會有不同嘅負面結果同下場。

第二個宗教嘅價值，which is我想探討嘅係為里民釋懷同provide＂答案＂。我從小讀宗教學校日日念經但係從來冇一刻真心相信有＂神＂同埋神嘅力量。對我嚟講，聖經嘅故仔等如伊索寓言，等如希臘神話。只不過係一啲大道理用故事去包裝，例如＂人心不足蛇吞象＂我諗唔會有人走去搵條蛇嘅化石再封佢為聖物再走去拜佢。

之所以話我曾經動搖過，係因爲當人生出現難關，尤其係生離死別，當人最desperate嘅時候就會咩滿天神佛，甚至異端邪說都會信，都會試。點解？因爲人係脆弱嘅，人係恐懼死亡，唔想相信人一死就灰飛煙滅，所以咪寧願相信有永生有輪迴囉。好驚失去親人，同摯愛陰陽相隔，咪想相信可以天堂見，可以下一世再續前緣囉。宗教最令人著迷嘅地方係可以令人釋懷，對我嚟講係古代心理學。

除此之外，宗教亦俾人好多＂力量＂，俾里民覺得你做某啲儀式就可以改變到現實。即係依家啲self-help book叫人每日對住塊鏡講十次＂你得嘅，你係成功嘅！＂咁做人就會成功啲一樣。你只要祈禱拜神就會得到庇佑，得到你想要嘅結果，你話幾吸引？當有人話你向主祈禱，神就會保佑你阿婆個手術成功大步攬過，我諗喺你最無助覺得自己咩都做唔到嘅時候，你都會覺得一試無妨。最起碼嗰一刻令你有所寄託。

宗教最最最犀利嘅係provide答案。當你阿婆最後冇事，當然有人會話係上帝顯靈，係神跡。但係就算阿婆真係出事，都可以有解釋話上帝召咗佢上天堂享福，唔洗再喺人間受苦。總之咩結果都講得通，都有解釋。你今日中獎係多得神庇佑，今日撞車係神俾你嘅＂考驗＂...相信大家聽唔少！人最困擾，除咗生老病死，就係randomness，好想相信everything happens for a reason。想覺得任何事都有答案，都有一個終極目的，咁就可以rationalize所有不幸事，不公平嘅事。

講到呢度，我依然係覺得宗教只要係道人向善，俾到信衆心靈上富足其實係功德無量。姑勿論呢個世界有冇神，嗰啲故事係咪真，我自己都唔知，我只係選擇唔相信啫。

例如輪迴，依家人口係幾百年前嘅十倍，邊得嚟咁多靈魂呢？又例如我總覺得耶穌係２０００年前嘅劉德華，有一班die hard fans跟隨住佢，神化佢嘅一舉一動。可能幾千年後有劉華教，會有人傳道講佢啲事跡，＂劉華本來得一隻手，同隻大鵰練武，之後生返隻手出嚟仲可以流住鼻血渣電單車呀！聽講佢唔會老㗎，又有秘史話佢其實結咗婚生咗個女，不過為咗啲信徒所以隱瞞..."




- 大C姐

大C姐

I believe in karma and good deeds but I ... don't believe in a particular religion...
Nam 發表於 2012-11-22 13:16

    某程度上我係唔信Karma，我覺得都係自欺欺人。大把人嚴人寬己，持強凌虐，但係大富大貴安享晚年。又有大把人一生為人服務，奔波一世好事做盡但係死於非命，不得善終。

我覺得存好心做好事都係對得自己對得人，希望其他人見到有樣學樣都對自己同其他人好。

大C姐

I don't fall into any kind of large, organisational type of religion.

2 things I do believe in (abi ...
Quest 發表於 2012-11-22 13:24

    咁你咪係category 4囉。唔係傳統宗教可以係new age，可以係冇一個完整宗教概念，可以係你有你自己心目中嘅神。

大C姐

前晚我先至再睇賭俠.

所以, 幾千年後, 會有:
劉華, 字德華, 小名刀仔, 法號慧果, 生於香港, 與愛侶麗倩( ...
rainbow-davie 發表於 2012-11-22 16:54

    EXACTLY我覺得就係咁啦。根本耶穌就係一個偶像明星，啲人越講越神化，當然有真亦有假，可能當年耶穌係一個表演者都唔定，自設不同角色，講無數＂舊約＂故仔。同金庸一樣，講講吓就有人信東邪西毒北丐係真有其人。亦好似依家都有人拜孫悟空，神打又無啦啦可以請孫悟空上身，咁係咪可以請埋多拉A夢同Q太郎呢？

我真心覺得劉德華可以做神囉，好似關二哥咁第日啲新紮師兄可能會拜劉華。

大C姐

應用這個詞 '無神論' 有問題，因現世現時，只有　’有神論’．

當你看不到，觸不到，臭不到，聽不到，沒有 ...
satil 發表於 2012-11-22 17:11

    但係有神係主流，美國到今時今日宣報新總統都仲係講＂God bless America＂。無論你信亦或唔信，依家好多大嘅戰爭都係同宗教有關，宗教嘅影響力係不容置疑。儘管你話＂看不到，觸不到，臭不到，聽不到，沒有證據＂，宗教喺好多層面上都物質化。

大C姐

只現時宗教只係一群人用來控制一大群人的方法及手段．
他們自己都對自己的宗教都一知半解． ...
satil 發表於 2012-11-22 17:22

    我覺得宗教都係口買口倍，都係普通人去演繹＂神嘅意指＂。所以講到尾，信衆只係選擇啱聽嘅嘢嚟信，一知半解係理所當然。對好多人嚟講，信仰只不過係一個club大家志同道合互相依賴，當得到想要嘅心靈上嘅支持，其實宗教都不過係一個theme一個打開話題嘅藉口。

大C姐

我是教徒, 但不是很虔誠, 我沒有得選...
mcjohnjohn 發表於 2012-11-22 18:13

    你算虔誠㗎啦，有返church又剩，唔好怕醜啦，信主咪大方認囉。

大C姐

我絕對信主, 呢點唔會怕醜既. 可是我真的不算虔誠, 成日為左去玩而星期日冇去教堂的. ...
mcjohnjohn 發表於 2012-11-22 18:31

    虔誠呢啲嘢係講心唔係講形式嘅，對我嚟講你算係虔心嘅教徒㗎啦。

大C姐

講開宗教, 話時話, 有無發覺突然好多人自己話自己係信徒! 尤其係一D剛剛預到重大挫折個陣, 搵唔到自己究竟 ...
jiujiujiu 發表於 2012-11-22 18:22

門門派派形形式式，其實有咩人就有咩宗教。其實你都見唔少＂宗教＂有好多偏激行爲，連叫啲信衆集體自殺都有人信就知其實好多人心底裏都有一啲＂偏激因子＂，只要有同類集思廣益就會將理念化成行動。

任何組織都想有權有勢，做該個
類別嘅一哥。宗教都唔例外，非我族類當然留不得，一係你就入教一係就打壓你。就算個別信徒做唔出過激行爲，心目中亦覺得自己嘅宗教地位超然，自我感覺良好。

同埋宗教都係人組織而成，當然open to interpretation啦。好似聖經裡面，上帝叫abraham親手殺自己個仔奉獻俾主以示忠心。如果今時今日有人咁做一定俾人告企圖謀殺，亦會俾基督宗教視為異端邪教。

大C姐

仲有有D人入教係為左識女仔囉
我以前聽到有人 (朋友既朋友既朋友) 話有個中年岩岩入教會 ...
reyes 發表於 2012-11-22 18:29

    或者上帝感召佢去教會認識另一半呢？如果真係搭上，仲係神嘅意指添！

都話宗教係咩都講得通。我又唔係好介意，我覺得都係正常社交圈子，健康社交活動啫。唔通啲人話去library識女仔你又話library唔係咁用，去coffee shop識人又話coffee shop唔係咁用咩！