返回列表 發帖

日本冬遊滑雪之旅/末日後新年寄語

本帖最後由 大C姐 於 2013-1-8 12:23 編輯

大家好,新年快樂!

我百忙之中抽胸嚟講幾句説話,講完就要撇。事關喺日本旅遊途中突然有人搵我合作做嘢,對方非常爽快,兩個禮拜已經傾好簽埋約,2013年我將會多份工作/多個新商機。所以嚟緊半年都會俾多啲時間落新公司,而且我仲有份"正職"要兼顧,所以我又要退隱一段長時間。

Anyway,呢啲大家毫無興趣,我只係解釋點解自己將會失蹤。講返冬遊日本,今次由南玩到北,幾個禮拜去咗好多個城市,從唔同角度去欣賞呢個國家。以前去日本東京都係去好短時間,而且都唔會一次過去好多城市,頂多尤新宿去六本目,由涉谷去台場,都係留喺東京area。其實由一個城市去另一個城市,中間嘅旅程都好值得體驗。好開心應邀去咗好多當地唔同城市嘅一啲festival同party等等。

比較值得講(其實係講唔晒所有去過嘅地方)就係北海道温泉滑雪編。尤其係當我支力到想死,行街行到腳斷,去到北海道一個寧靜白色嘅國度,所有嘢都慢啲,優雅啲。最緊要係租車啦,唔洗行就差好遠。識我嘅人都知我係好驚死,所以對租車都有一定要求,四驅加雪呔走唔甩。但係去到北海道,周圍都係啲細車&麪包車,啲車轆係幼到呢... smart car條呔咁上下,我唔明點解可以行到。不過鏟雪真係鏟得好快,大部份"公路"時速亦唔係好高,所以相對安全。

我第一次去日本滑雪,今次去(niseko/ hirafu),比想象中大,同好滑。其實去開whistler blackcomb都會覺得其他地方好難有得揮,事關又方便,你去瑞士法國嗰啲係遠離主要城市好遠㗎嘛。咁日本唔算太遠都係within 2-3個鐘車程(from 札幌),而且去到個ski village,雖然冇whistler咁熱鬧,但係都有嘢食,有嘢飲有啲值得去嘅餐廳同bar,玩幾日絕對唔會悶。嬴whistler嘅地方係一,冇咁多人,二有night ski(可以滑到夜晚8點8點半)。所以如果你係hardcore skier/ boarder,你可以滑好多個run,滑到淋冧凜。

另外我又去咗幾多地方浸溫泉啦,講到日本溫泉文化真係冇得輸!景靚,優雅,細心,乾淨,好多仲一日開22個鐘,半夜想浸都得。試想吓落住雪喺一個日式庭園裡面浸住啲溫泉水欣賞大自然景觀同日本人精心設計嘅花園... 幾咁賞心樂事。你想要有privacy亦得,我又試過私家溫存,可以飲住酒,敷住mask,聽住歌浸又正。

同埋今次落重本食咗兩餐懷石料理。點解話落重本呢,事關對上一次喺京都食過一次懷石料理雖然唔係平,但係唔係頂級價錢,啲嘢真係一分錢一分貨,普通過普通。今次死人都要喺末日前食盡佢,我覺得終於食到日本懷石料理嘅精髓。我發現香港人食呢啲懷石料理一係就喺自己酒店房食,一係就要包場食。因爲香港人嘅attention span實在太短,要坐定定食幾粒鐘係冇可能。食兩度菜又去影相,又去走嚟走去,又要上網又要追大太監,又要去廁所又要食煙,又要飲酒又要講電話... 好彩我係喺private room同包咗間餐廳食,所以先避免失禮。

溫馨小貼士,去北海道唔好盡信GPS嘅ETA,可以同現實差一個鐘。同埋一定一定要着winter gear鞋,因為會跌死。



2013年寄語,都有少少嘢特別想講,我自己就覺得同一般"香港人"開始有gap。事關我發現香港人好鍾意鬧爆,仲要逼你or鼓勵你同佢哋一樣鬧爆其他人。好似屋企有個case係某親戚娶新袍,佢就唔係好成熟啦,廿幾歳女態度好差啦(so i heard)。其實都屢見不鮮,咁呢啲情形都係要慢慢溝通,結婚都唔夠一年你唔可能祈望一個人結咗婚就即刻變成熟同好有責任感。咁long story short,一班長輩就喺whatsapp不停講佢嘅壞話,數佢不是。我嘗試講啲中庸啲嘅説話降温,冇人聽入耳。但係一有人鬧爆所有人(包括我自己覺得一向好理性嘅長輩)都俾"like"。

我覺得好多地方香港人都好鍾意鬧爆,好似對強國人咁,我覺得已經係對人唔對事。老實講,自由行嚟買嘢,其實唔係錯啫?幾多人北上掃平貨,深圳羅湖城東門咪一樣迎合你哋班香港蛋散。去到日本都一樣見到有menu有標誌係寫中文同韓文方便遊客,你又唔好話日本人比強國化叫佢哋寫返日文?

再講,你喺香港好多大餐廳,過去數十年得法文同意大利文嘅menu,又唔見啲人投訴?點解有簡體字就E嘩鬼叫?你哋香港人去其他地方移民做生意大大隻中文字做招牌又有冇西人叫你哋返鄉下?

就連Vancouver都唔係自己地方,都要"維護"香港文化,覺得richmond係香港人所有,強國人"侵佔"同"攻陷"呢個地方。喺另一個post啲LYK講嘅嘢,恕我直言,真係霸道到不得了,衰過好多強國人。個hidden message係越嚟越多人講普通話好似好唔啱咁,講廣東話先係richmond傳統文化同official language。好多老華橋淨係講廣東話就冇問題,喺Vancouver或喺香港講普通話問路買嘢就好"忍受唔到"?根本講唔通。

點解依家啲香港人咁唔理性咁盲目去"保維"香港文化。我又唔覺得香港人以前滿口英文嘅時候又有人出嚟保護廣東話。其實我想講,一切都係過程,香港回歸中國係既定事實。中國化係好理應發生嘅事,等如英國一樣注入佢哋嘅文化入香港一樣。當然文化差異係有,但係我又唔太驚會變壞,我真心覺得大陸越嚟越開放就會越嚟越文明。香港人要放鬆啲,胸襟大啲去教育返啲遊客。好似你去日本搭車唔准講嘢,當你見到其他人好靜,你自己大聲啲都覺得面懵啦。最緊要係唔好歧視,唔好成日話強國人咩強國人乜,大把鄉下嘅人冇受過教育,亦有大把國内人係知書識禮,比香港時下o靚仔level高幾十級。

我嘅寄語係"放下,自在"。唔放下偏見,怨恨,永遠唔會懂得欣賞別人好處。對政府一樣,個個嚴人寬己,捉人錯處就容易,反對其他人就落力,寒窗苦讀落手落腳從政,有意去做特首又有幾多人?


最後都祝各位新一年開心啲,搵到自己嘅幸福,多啲包容同感恩。


-忙到甩轆嘅大C姐

回復  大C姐

好一篇文章……

但係,還是只談風月好了……

如果政制公平,大家還可以加上—句"共勉之"… ...
lo_pak 發表於 2013-1-8 22:48




你可以話係正中下懷,講咗好多香港人劣根性thought process。

我係講對人鬧爆,唔包容,歧視,根本呢啲就同政治毫無關係。打你尖嗰個阿嬸逼你讀洗腦班呀?去香港買奶粉啲C拉封鎖你言論自由咩?唔通所有講普通話嘅人都係共產黨員?

我想講係,好多香港人去到一個"對人唔對事"嘅情緒。總之中共有咩睇唔順眼就將負面情緒放落所有中國同胞到。你喺richmond見到有強國人公眾大便係佢唔啱,但係同"中共繼續不譲香港民意洩洪"係兩樣嘢。

如果咩都混爲一談,咁你同大陸冇受教育嗰啲暴民因爲釣魚島而燒日本車,搗亂日資公司有咩分別?



香港人對大陸人有偏見屢見不鮮,係事實就要承認,唔好不斷俾藉口自己去歧視別人。你要去反對某啲政制有你嘅自由,但係向普羅市民發放負面能量,無理嘅挑剔,莫雖有嘅指摘,放大其他人缺點50步笑100步就好缺德。

TOP

回復  嘉嘉

小食多滋味……

話時話,懷石料理可以食得飽人真係比較小聽見……

又或者,養你真係好容易 ...
lo_pak 發表於 2013-1-8 22:25



    我諗你冇食過真正懷石料理,起碼10度菜而且好多時都有飯or粥所以份量唔會少。況且食得慢,其實會飽啲。

我嘅體驗係食到唔想食(有啲眼訓),連碗三文魚子都食唔落。

不過你去旅行一日食4-5餐,寧願質數高啲其實唔洗食到咁飽。

TOP

懷石我係香港食過(算正宗呱), 份量OK啦, 不過我都食哂
咁女性方面係食唔哂的 ...
reyes 發表於 2013-1-9 14:05



    男女都一定食得飽...

[img[/img]
[img[/img]
[img[/img]

TOP

回復  大C姐


    一鑊上哂
冇驚喜
搞到冇哂胃口
點食幾粒鐘
sheep 發表於 2013-1-11 15:53


啲相係喺website嘅promote,真係食嗰陣係一度度菜上,每度菜都有驚喜。

再講,淨係啲碗碟都好精緻,而且佢time好時間入嚟唔會打攪你食嘢同傾偈。好細心㗎!

TOP

回復  大C姐


如果能夠公平,公開,公正咁討論固然係好……
奈何,自由嘅空氣越嚟越稀薄…… ...
lo_pak 發表於 2013-1-9 11:51


好多人將言論自由變成將問題無限放大嘅藉口。當有平台去公平,公開,公正咁討論嘅時候,好多人浪費呢個機會去抱怨,惡言相向,打壓異見,甚至發放暴力欺凌負面嘅訊息。

我諗要有多啲有理念又有前瞻性嘅人物出現,唔係空口講廢話,倒呢個,反嗰個。而係真正懂得政治事務,有領導能力嘅人去從政。

只會每日哭哭啼啼嘅人,同被老公瘧打而又唔肯離婚嘅女人一樣。

TOP

一之過上哂真係一睇就唔夠, 不過慢慢上又真係會覺得食飽
reyes 發表於 2013-1-14 14:32



    我住呢間酒店係sell健康同精緻,唔係暴飲暴食。老實講,人大咗食嘢都好節制,寧願食得好啲都唔寧願食得過量。人哋係唔會預你食唔晒樣樣食剩啲,佢仲問我哋夠唔夠,可以送多個course俾我哋。

我本人覺得已經好豐富,尤其有和牛,食兩啖都覺得好膩,切忌眼闊肚窄。

TOP

Japan was on my top travel list BUT....not any more...
I'm still afraid of the radiation level ... s ...
fibbi 發表於 2013-1-14 14:44



    冇得驚,我上年去咗幾次日本。

其實要驚都唔知可以點避,係咪連日本米,日本魚都唔好食?

雖然我都好怕死,但係日本人都唔驚,去幾個禮拜怕邪唔死得人啩?

TOP

回復  大C姐


    As I said, just for myself, I'm ok. But with little one, as a parents, will try t ...
fibbi 發表於 2013-1-14 15:25



    冇辦法啦,都唔知去邊度旅行好,歐洲好多地方經濟差,啲扒手黨好似好倡狂。

本來想去埃及同土耳其但係政局又不隠。今年如無意外會去德國。

TOP

本帖最後由 大C姐 於 2013-1-14 17:04 編輯
how much u spent for the trip?
chunsh 發表於 2013-1-14 16:10



    你講去日本?

計唔到...因爲今次好多都唔洗我俾錢,有sponsor,我諗最貴都係食懷石嗰間溫泉酒店,咁一晚連晚飯+早餐+private onsen都係$500CAD啫,都唔貴。

其他好似去滑雪,ticket同rental價錢同cypress差唔多,一定平過whistler。

反而食蟹宴就貴少少,但係每次去日本都一定要食蟹膏壽司同蟹sashimi。真係其他地方食唔到。我會預$150+/head連酒水(其實食蟹宴通常係揀一個set包好多嘢,另外再加a la carte咁大家share)可能多人食除開又好似低啲。兩個人可能覺得貴?

機票就睇你坐咩class同咩airline啦。內陸機(JAL)由東京搭去北海道大概$350CAD,都係唔貴。

我唔覺得日本貴。唔知點解好多未去過日本嘅人成日都話日本好貴。

TOP

返回列表