永遠懷念的....麥當勞 家族, 玩具

大C姐

追近唔知點解好多人post有關shake shake薯條嘅廣告﹐突然忽發其想﹐令我好懷念以前嘅麥當勞。老實講﹐近十年八載都好少食﹐一來質素確之而下降啦。舊陣時個巨無霸真係好巨型﹐所以先有紙盒。食完真係飽﹐同埋覺得麥當勞係好老少咸宜﹐好多老豆老母戴D仔女去食餐麥當勞當獎勵。而家D細路鬼咁識食﹐一個魚柳包係絕對收買唔到當代班o靚仔。

另外一定要講就係80年代90年代頭出好多D玩具都好別緻。全部用翻晒麥當勞家族成員﹐成件事好有風格﹐好深得民心。但係近年玩健康﹐玩新鮮﹐玩活力。搞埋晒D麥叉燒包﹐麥餐蛋麵﹐麥日式豬扒飯﹐但係主打果D包就一浸膠味﹐每況越下。

可唔可以開翻間80年代主題麥當勞﹐或者limited edition一個月整翻以前D包﹐唔好叫容祖兒跳嚟跳去都唔知sell緊乜﹐俾翻滑嘟嘟同漢堡神偷我啦。





-- "小飛飛想學飛﹐麥當勞叔叔教得佢好有心機" 麥C姐

大C姐

雖然我無玩玩具﹐但係記憶中﹐以前麥當當節日實會出精品。聖誕有聖誕裝飾(有香味掛聖誕樹既ginger bread man﹐同glow in the dark嘅星星)﹐過年又有麥當當叔叔同人嘅利是封同$5 gift certificate。