|
|
仲有6個月就到冬季奧運﹐由本來談論應唔應該舉辦到好多唔同建設追唔追得上進度﹐到而家好多人都揾緊地方哩(聽講去墨西哥D機票都炒貴晒)﹐已經可以話係去到一個水深火熱階段。
其實我都好支持搞奧運﹐雖然我從來無睇過﹐亦唔知究竟有咩刊目﹐但係都覺得係一件盛事啦。本來我都作出準備迎接奧運﹐但係到今時今日我覺得有幾個謎想同大家分享。
謎一﹕奧運期間 = 世界末日?
我之前都講過啦﹐政府交通部之前出memo叫溫市市民唔好渣車唔好搭skytrain﹐果兩個禮拜最好行路或者踩單車返工。上班一族係彌漫住一份白色恐佈﹐個個都人心惶惶﹐好驚返唔到工。當然傳媒亦有意無意去誇大某D數目﹐令一般讀者錯覺奧運期間係會有幾千萬人上街橫行等等。
首先﹐二月對好多人嚟講都要返工返學﹐真係去旅行果班都唔會拖男帶女有老有嫩﹐頂多係果D住青年旅館十幾二十歲學生居多。同埋唔好話我話﹐老老實實有幾多個國家參加呢個奧運? 出名運動細胞叻嘅非洲人係唔滑雪既﹐亞洲頂多有日本同韓國叫做有滑雪嘅習慣。基本上都係北美﹐澳洲同歐洲人叫做係對冬季運動熱血D。美國仲係一團糟﹐澳洲人就不嬲都好鍾意嚟Vancouver打工﹐我唔知澳洲仲淨幾多人。歐洲國家之中﹐我哋熟識嘅英國係無雪山。我亦問過我D英國朋友﹐係從來無人留意冬季奧運﹐頂多係娜威﹐瑞士﹐瑞典﹐冰島﹐法國北部呢類國家較有認識。
但係大家有無留意﹐呢D國家全部都係以地大人少見稱。我敢講所有人加埋都夠你平日去中環lunch time揾位食飯咁迫﹐亦都唔夠周末去旺角行人專用區咁多人。我覺得講到會成個市癱瘓未免有點兒浮誇。
謎二﹕樓價奧運後標升?
好多經紀都會說你買樓﹐因為佢哋好鍾意話奧運會吸引好多遊客(因為全球人類都有睇開冬季奧運)﹐之後就好__多人會擁住嚟移民。Excuse me﹐乜而家移民加拿大好易咩? 我當年搞都搞幾年啦﹐我當你超鍾意Vancouver﹐你要申請都唔係一朝兩日嘅事。但係唔知點解﹐D風吹到會有新一輪移民潮。
我唔否認某D地段因為交通好左所以會好賣D﹐但係大圍係唔會因為奧運﹐之後幾個月就大批人會掙住買你D樓囉。有D人實會話﹐唔係啵C姐﹐你唔好忘記仲有人由其他省可能會搬嚟Vancouver﹐唔洗搞移民。但係我好想講﹐其他加拿大人未至於未見過Vancouver呀嘛? 又洗唔洗等奧運後先嚟搬呀? 同埋對好多人嚟講﹐其實Vancouver都係偏貴﹐你多倫多廾幾萬可以downtown買到個apartment﹐但係你呢度要30幾40幾萬起。
無疑呢個係一個宣傳機會﹐但係要諗到好多人掙住嚟﹐嚟完又唔捨得走要買樓﹐我諗係好多人一相情願嘅諗法。大家唔好俾報紙同地產佬徒毒啦。
-- 唔洗打瘦面針都瘦左個圈嘅大C姐 |
|
發表於 2009-8-19 22:42
| 
