香港報業發展係極為珍貴嘅歷史，樹仁大學新聞與傳播學系系主任梁天偉教授同副教授黃仲鳴博士，獲得大學教育資助委員會研究資助局資助，合力開展「香港報人口述歷史」研究計劃，一共訪問28位資深報人，包括星島集團前主席胡仙，以及《信報》創辦人林行止妻子駱友梅等，出版《數風流人物──香港報人口述歷史》，為香港報業史補白。 罕有接受傳媒訪問、有「報業女王」之稱嘅胡仙，訪問中細說《星島日報》秘史。胡仙憶述父親胡文虎喺東南亞發行十幾份華文報紙，最初係宣傳自己生意，後嚟發現社會有好多不公事，於是透過報紙發聲。1938年創辦《星島日報》，當時香港已有《華僑》同《工商》，胡仙話競爭相當激烈，香港淪陷期間，《星島》雖然仲有出版，但受日軍控制，冇用原名而改稱《香島日報》，先可以稍微自由發揮。喺香港聖保祿讀書嘅胡仙，未畢業就入報館，原先佢大哥胡好係社長，但1951年轉調新加坡《虎報》任社長時，卻遇飛機失事過身，佢就接替大哥做社長，嗰時得嗰21歲。1954年父親病逝後，接掌星島報業。至於點樣將《星島日報》、《星島晚報》同《虎報》轉虧為盈？胡仙話係要打關係，擴大知名度，憶述當時每年都舉辦歌唱比賽、環島步行同連串籌款「發財運動」，強調「要『好賣』，不可能立竿見影，要花好多時間才可成功。」《星島》一直用中華民國年號，中華民國同公元並用，胡仙自爆前任新華社社長許家屯1994年要統戰佢，佢知道唔再能夠保留中華民國年號，加上九七回歸在即，傳媒要繼續生存就要面對現實，所以就喺當年轉為公元紀年，「那年也是我第一次去北京，因為他們要統戰我，機會難得，獲總理李鵬和國家主席江澤民接見」。大家可能好想知道，1998年「胡仙案」內幕？訪問中無提到，但胡仙透露理財不善，被迫出售《星島》股份，「當時《星島》正在賺錢，我希望債權人何伯（何英傑）能給點時間讓我還錢，但他不肯，他一直都想將《星島》送給長孫何柱國。那時我們周轉不靈，又遇上股市下跌，《星島》最終轉手何伯。」  | 
發表於 2018-2-5 07:11
|