失散多年的故事

故事, 失散

本帖最後由大C姐於 2010-7-27 22:39 編輯

今次無poll﹐淨係求分享幾個故仔。

最近諗起一個兒時片段。話說大C姐十歲左右﹐屋企突然邀請左一位中年男人同一個疑似女朋友嘅人物返嚟食晚飯。記得當時好大場面﹐基乎所有大C母果邊嘅親戚都出現晒。原來呢個中年男人係一位失散多年﹐可以話係我嘅"舅父"。

因為當年大C姐好細﹐又唔好意思問﹐但係都張開對耳聽住班大人傾計﹐希望知多D點解無啦啦會出現多個"舅父"。原來果個年代好興養子﹐明明無血緣關係但係無啦啦一齊住當仔女養又有﹐親生仔又俾人養又有﹐人物關係永遠係好亂。呢位"舅父"就係俾我公公婆婆好細個收養左﹐但係到10幾歲之後又犯左D錯﹐坐左監。其實唔係坐左好耐﹐但係可能又無面﹐又或者唔想面對﹐所以就無揾返我D屋企人。其實大C母同成班兄弟姊妹都有打聽過呢個"舅父"嘅消息﹐但係70/80年代人浮於事﹐個個各有各忙﹐有自己家庭又淡忘左呢件事。但係偶然機會之後又撞翻呢個"舅父"﹐其實以我記憶﹐呢個reunion只係得一晚﹐因為果日之後﹐都無再見過亦再聽過任何親戚再有佢嘅任何消息。

點解大C姐無端端會諗起呢個兒時片段呢﹐因為最近聽到一個朋友嘅親身經歷。話說大概年前﹐我呢位朋友Alfred喺屋企接到一個電話。電話中係一位中年女人﹐"請問Maggie係咪度呀?" 當時Alfred係好愕然﹐因為Maggie就係Alfred媽媽嘅洋名﹐而Alfred媽媽已經過身多年。Alfred好唔自然咁同對方解釋﹐而且問對方係邊位。對方個reaction當然都好愕然(dead air左數秒)﹐其實呢個中年女人係Alfred細個果陣一個朋友仔嘅阿媽(馮太)。

點解過左10年馮太無啦啦會打個電話嚟呢﹐原來佢個仔(直係Alfred兒時朋友)入左UBC﹐又知Alfred呢家人喺Vancouver住﹐所以就膽粗粗試吓聯絡翻一個舊朋友。聽落可能會講"車﹐有幾老友呀﹗10幾年都無通訊﹐連人死左都唔知﹗"但係確實某年某月某日馮太同Maggie係一對孖公仔。當年兩個少婦帶住兩個讀緊Kindergarten小朋友﹐有咩生日會有一齊去﹐有咩唱遊班又一齊sign up。但係過左一段時間﹐呢個仔讀唔同學校﹐再過D Maggie又移左民所以可能失左聯絡。其實Maggie移左民之後有無繼續同馮太聯絡都無人知。而當Maggie因病過身以後﹐Alfred同屋企人都只有通知親戚﹐都無辦法亦唔知有無通知得晒所有Maggie生前朋友(唔通登報紙咩﹗)所以﹐馮太當時知道呢個惡號都唔知咩反應﹐亦覺得好黯然。Alfred對住呢位其實唔係好有印象嘅Auntie都唔知可以講D咩。

其後﹐Alfred有同呢位失散多年嘅兒時朋友從逢。但係都係見左一次﹐就再無約出嚟。不竟相隔10幾年其實都唔係對對方好有印象﹐而且大個之後又未必真係有common interest。

蕭亞軒★突然想起你