男友／老公一百戒條（男人回應版）(上)

ayako

相信呢個男友／老公一百戒條大家都可能已經睇過,
但原來網上亦有流傳一個男人回應版, 你地又知唔知呢~~
每次睇都笑死我~~~ enjoy~~

(因為出post 有字數限制, 我分開兩個post 出先~~)

===============================================

男友／老公一百戒條（男人回應版）：

1. 唔准同任何15歲以上 35歲以下無血緣關係既女性單獨外出或者傾超過5 分鐘電話。
咁單獨響室內都OK好玩架，而且我都讚成玩sms同web cam刺激D。

2. 我'meet'你既時候你唔准縮。
可以還拖呀？

3. 我唔會check你既來電顯示，但係你最好唔好俾我聽到你同不明來歷既女人講電話。
一定唔會俾你聽到，放心。

4. 你個電話裡面只可以有兩個女人既相，你媽媽同我。
我似唔似低能到放其他女人張相響手機先？

5. 唔好俾我見到你著白襪，除左打波既時候。
我直頭唔著襪添。

6. 我明白每個人都有過去，你會有舊情人既相呀信呀禮物呀，但係唔好o係我面前飄揚，有咩爛左唔好怪我。
咁如果成個舊情人響你面前飄揚，你係咪整爛埋佢？

7. 我鍾意收情信，但係好憎見到錯別字。
我相信我中文會叻過你。

8. 每日起碼要打一次電話俾我，因為我會掛心你。
咁你打俾我囉，因為我都掛心你喎。

9. 你要俾我知你去左邊，我唔係要check你行蹤，只係如果新聞話有三名行山人士失蹤，我要知道係唔係你。
咁就死啦，通常我呃你都係話去左行山架喎。

10. 我地未必可以一生一世，但希望你同我一齊既時候，每一刻都對我認真。
咦？唔係一生一世架？咁認真做乜？

11. 我鍾意既手袋牌子係Lu Lu Guinness、Kate Spade、Anya Hindmarch、che che、 agnes b 同 Tod's，你千祈唔好買Patrick Cox同Westwood俾我。
我咩都唔買，乖唔乖先？

12. 你心裡面諗d咩，一定要同我講，因為我好蠢，你唔同我直接講我唔會知道。
冇問題，我反而驚直接同你講你都唔知我諗乜喎。

13. 我去dating你叫我玩得開心d既話，我會以為你唔愛我唔緊張我唔想要我。
咁我祝你笑住咁去喊住咁返好冇？

14. 我鍾意男朋友買香水俾我。
但係我唔鍾意女朋友噴香水果下弊喎。

15. 我希望你會記得一切既大時大節生日同紀念日，我唔會提，亦會扮大方，但唔代表我想你失憶。
我唔做野又唔代表我失憶架喎。

16. 男子以才為貌，但係都要乾乾淨淨。
你有冇聽過有才華既男人通常都係不修邊幅架？

17. 唔好企圖或意圖用「中五妹妹仔o者…… 」黎做藉口安慰我，我唔會睇小妹妹仔既威力，因為我都曾經年青過。
咁呀，「我補習o者」。

18. 我慣性去i.t、Marie同Lane Crawford買鞋，鞋碼係Italy 36.5。如果你打算買鞋俾我，記得唔好買錯 size 。
嗯……暫時未有呢個打算。

19. 唔准對我講大話。
我從來冇呃過你，問你怕未？

20. 唔准一腳踏兩船 (或以上 )。
即係一隻腳以上就OK？

21. 除非d食物好美味，否則我唔想去任何張椅冇椅背既餐廳。
識你咁耐都唔知你鍾意椅背添。

22. 出街一定要拖實我，因為我會蕩失路。
OK，但係如果拖住都仲蕩失，可唔可以唔插我？

23. 我唔揀飲擇食，所以食咩你話事(法國菜除外)，不過，揀甜品既主導權歸我。
你唔揀飲擇食，不過好多野你直頭唔食o者。

24. 如果我遲到，都只係因為我想著靚d見你，所以你唔好鬧我。
咁點解有時你會早到架？

25. 你最好唔好有一堆女性朋友同契妹之類既不明物體o係身邊，否則我會大你三十萬用行動證明俾你睇我都有一籮男性朋友同契哥加uncle。
咁咪幾好，熱熱鬧鬧台慶咁。

26. 我係一個會講粗口既淑女，你最好忍耐一下。
我都只不過係一個會滾0既好男人，承讓承讓。

27. 食飯時第一箸夾既食物記得要係俾我既。
得，通常我夾第一箸都係我唔鍾意食0既野黎。

28. 我唔會要你幫我去麥當勞換公仔，但係會叫你幫我去Sogo、Joyce同Lane Crawford 買化妝品。
我揀換公仔。

29. 你唔好走去旺中買o個d所謂既純銀俾我，我會皮膚敏感。你有3個選擇： 1. Tiffany 2. Georg Jensen 3. A Different Corner
我應該買埋枝藥膏俾你，係我唔好。

30. 鑽石同珍珠，我永遠都唔會嫌多。
你係嫌我錢少o者。

31. 我會想你同我一齊揀Lingerie，你唔需要面紅。
好呀，我想幫你揀件易除D既好耐喇。

32. 我唔會問你我靚唔靚 (因為我知道我唔靚)，你最好諗定第二樣 o黎讚我。
咁……就……不如讚返靚算啦。

33. 我鍾意食Cova 既tiramisu、Zoe既 zoe同1459 ，仲有 Glace既Rose。
咁你記得去食喎。

34. 我知道你冇可能每秒鐘都掛住我，但係如果你全日都冇諗起我，我會好驚。
咁我仲驚過你。

35. 如果你著到成個板仔或者 MK Guy咁樣同我出街，我會面青。
著成咁通常我係同第二個出街。

36. 如果你郁手打我，我一定會走。
如果你逼到我要郁手打你，我打完先走。

37. 你要留意亦舒既新書幾時出，儘快買俾我。
咁你等我買啦喎。

38. 記得要多d同我既父母 social，因為我同佢地關係唔好，靠你去修補。
我驚我同佢地關係太好，你仲大鑊喎。

39. Shopping 時可以分道揚鑣，但係你唔好又要企我隔離又要黑面。
我直頭彈開啦。

40. 我好樂意同你行你鍾意既舖頭，你唔需要怕我悶，我會自得其樂。
你真係唔出聲？

41. 行入7仔我只會買 3 種飲品：柑桔檸檬、參蜜同 Perrier。
我又要！

42. 唔好批評我既好朋友，因為我同佢地共過患難，唔係酒肉朋友。
咁可唔可以叫你班好朋友都唔好批評我架？

43. 我承認我係一個膚淺既人，我既日常讀物係《忽然一周》，你唔高興既我會隊本《紅樓夢》俾你睇。
睇左啦，我鍾意三國演義多D喎，一齊睇丫？

44. 我唔介意你望靚女，介意既係有筍野睇你都唔同我講。
我介意0既係次次話親俾你聽，你都話唔靚喎。

45. 如果你見到我望住本《飲食男女》兩眼發光，你可以留意下係邊間餐廳，唔太貴既就帶我去試下。
通常響呢個時候我兩眼發光咁望住忽周封面女星個胸，邊得閒呢又？

46. 我鍾意食魚蛋河，但係如果大時大節紀念日生日時都係食魚蛋河，我會發火。
咁得勒，剩係果幾日唔食，好未？

47. 我喊既時候，你一定要 '乙水 '我，因為我只會響好傷心好傷心既時候先喊。
你都好傷心好傷心咯，梗係由你喊啦。

48. 你打機既時候，我會自己搵野做，你唔需要擔心，最好你教我打埋一份。
唔好啦，你自己搵野做啦。

49. 你最好有一首只係屬於我既電話鈴聲。
職業特工隊OK？

50. 如果你冇開口講，我都為你去改變，代表我真心鍾意你，請你珍惜我。
我唔開口講你都變，咁會唔會係你估錯架？