男友／老公一百戒條（男人回應版）(下)

本帖最後由 ayako 於 2012-6-25 10:07 編輯

51. 我好樂意幫你煮飯洗衫執屋做massage，但係請你唔好當「奉旨」。
唔該囉。

52. 買野俾錢既時候，你記得要快我一步拎張credit card 出黎，因為每個月俾完家用同找完經常性咭數之後，我既 account 只會得番$2000 cash。
咁你叻過我勒，我連$2000都冇。

53. 我會間唔時嗌「我好想嫁我好想嫁 …… 」呢句係我既口頭禪，你唔需要太恐慌。
我直頭當聽唔到添。

54. 你需要比我更清楚我既電話、 DC同電腦既操作。
容乜易，清楚你就話o者。

55. 當你睇波既時候，我會問你「咩係12碼」等低 B問題，你唔好嫌我煩，因為我真係有興趣，但從來冇人教過我。
可唔可以睇完場波先問？

56. 我會希望你將我介紹俾你既朋友識。
你唔好後悔喎。

57. 放假時我會間唔中留o係屋企休息，你即管出去玩，唔好以為我係貼身膏藥你唔同我出街我就唔出。
你休息多D添啦，你睇你近排瘦到呢。

58. 因為我有一d 唔係太開心既過去，對人好冇安全感。所以請你用用行動話俾我知你對我係認真既，你唔係玩玩下。
咁你又叫我唔好呃你，我好難做架喎！

59. 你先要努力工作，然後盡量抽時間陪我。
咁你做乜？

60. 你唔需要係有錢仔，但係要有上進心，想出人頭地。
哦咁得啦，我成日都想出人頭地架我。

61. 你一定要有自己既理想。
個理想你唔問得唔得？

62. 我唔會問你「我今日有咩唔同」，你唔需要每次見我都恐慌性將我由頭到腳 scan一次。
你唔會日日都一樣卦？好悶架喎！

63. 我想睇日出。
其實呢，同日落係一樣架，信我啦。

64. 我有寫 blog既習慣，如果你發現o個篇係講你既，你最好俾 d反應我。
閱。

65. 我知道我好刁蠻任性。
客咩氣丫衰鬼！

66. 你要做我既人肉地圖。
即係點呀？o拿，我個左胸就係沙田，我個胃就係九龍城，對落就係尖沙咀咁呀？

67. 我M之前一個星期會情緒暴躁，你要小心d 。
究竟你一個月會黎幾多次M呢？

68. 我發脾氣cut你線，你唔好即時又打電話俾我，send SMS得架啦。
我直頭唔打俾你添啦好未？

69. 絕對唔可以check我既 ICQ、MSN同 SMS。
你驚成咁做乜？

70. 如果你發我脾氣仲逼我上床，我會覺得好hurt。
如果咁情況我仲同你上床，我驚我會仲傷。

71. 你煮飯俾我食，就算只係一碗餐蛋麵，我都會開心過食Rougie 鵝肝。
你早D講丫嘛，咁今年情人節，屋企等。

72. 我同你講野既時候自不然會嗲聲嗲氣，我都冇辦法架。
咁有冇辦法響你發老爛果陣細聲D呢？

73. 我好有興趣知你既戀愛史，最好由頭到尾同我講一次。
我驚你聽完之後對我冇哂興趣喎。

74. 因為愛你，我會珍惜自己，要自己身體健康，叫自己開開心心，你都係。
嘩，咁你未愛我之前點做人架？

75. 如果有一日，我地分左手，我都希望可以繼續做朋友。
記住喎，千祈咪拿把較剪剪我喎。

76. 我唔係唔想陪你著牛仔褲，而係未買到o岩我著既牛仔褲。
我都唔著小背心，做乜你又成日著？

77. 我最憎人唔信我。
係，不過你最鍾意唔信人o者。

78. 如果你愛我，你唔會捨得要我傷心。
如果我愛你就梗係格，定喎。

79. 我都鍾意行山，不過你可唔可以搵 d易行d既路線俾我。
時代行去世貿或者朗豪坊行去旺中囉。

80. 一個男人對女人最大既尊重係向佢求婚，其次係帶佢返去同父母食飯。
咁又係呀，求婚果下係最大尊重架啦，結左婚之後你明啦。

81. 男朋友既功用係對女朋友好，女朋友既功用係對男朋友好。
你唔係成日老公老公咁叫我架咩？

82. 我用慣 LUSH既 soap，麻煩你每個月去買一塊俾我。
我冇折喎。

83. 好多事唔係我懶底扮唔識搵你做，而係我真係唔識。
我信你喎，好似電腦咁，check我email呀icq呀咁，你幾曾有叫過我幫手？

84. 我希望你間唔中都會俾比d小驚喜我，係「小驚喜」，唔係「大驚喜」。
咁呀，你記住等下喎，千祈咪問我呀，唔係就唔驚喜架喇。

85. 你講過，而我又應承過既，我一定會做。例如：你唔 o係我身邊我就要凌晨1點前返到屋企。
咁你應承完又唔記得左果D計唔計架？

86. 唔好熄電話，萬一半夜我要去急症室我會想你陪我。
就咁，唔熄冇問題，但真係唔包我聽到架喎，不如你叫我唔好訓罷啦。

87. 我最鍾意既花係peony，最鍾意既顏色係紅色。
我最鍾意o既遊戲機係ps2，顏色係白色。

88. 我唔多鍾意收花，你送盆栽俾我好過。
講明先，我間房冇位擺盆栽，我亦唔識種。

89. 每次出街請你俾10分鐘我去行書店。
書店有忽周賣咩？

90. 如果你見我個樣冇乜表情，唔係我唔緊張你，而係愛一個人就會變得笨拙，我唔知用咩表情面對你好。
咁你而家明白點解我見親你都喪屍咁啦，你愛我愛成咁。

91. 如果有人追你，記得同我講，我會用掃把掃走佢。
記得我一定同你講。

92. 好遺憾我冇機會細細個就識得你，所以宜家請你俾多d時間我，俾機會我去了解你。
希望我退休之前你會了解我啦。

93. 我既工作或者比唔上你既重要，但我都希望你會尊重我既工作。
我絕對尊重你果份上進心同人工。

94. 你唔開心既時候我會靜靜行開俾時間空間你冷靜，但過後我會想你打返個電話俾我，因為我關心你。
哦，即係我有事你就行開，我冇事就叫你埋黎，咁好易喎。

95. 著得sexy係有兩個原因：1. 我覺得靚 2. 等你緊張我。
再咁落去我驚你要除哂先安樂喎。

96. 我知你對我用咩化妝品護膚品冇興趣，不過問下咩顏色好都得掛。
幾錢先？

97. 你要記得間中同我講「I love you」，否則我會以為你唔再愛我。
我會間中同你講「I love you」，等你以為我愛你架。

98. 我地要開一次會，睇下你對呢d 戒條有冇異議。
都好，順手睇你對我D回應有冇異議。

99. 條文內如果有唔清楚既地方，以我既說話為依歸。
咁你不如由頭講多次丫。

100. 其實，我明白這些戒條有點吹毛求疪有點不設實際有點妙想天開。我只想你知道，在寫這些戒條的時間內，每一秒鐘，也在牽掛你。
既然你掛我掛成咁樣，有時你唔掛我都唔mind喎。