|
|
恭喜發財﹗祝各個蛋散們身壯力健﹐心想事成。
唔講唔覺﹐我都好多年無喺香港過正日新年。通常一二月都係一年最忙嘅時候﹐我通常都係喺五大洋七大洲揾緊銀。
人大左自然鍾意想當年。好懷念以前過年果種氣紛。最記得係細個成日俾D長輩鬧我口沒遮欄﹐講埋D唔吉利嘅嘢﹐俾人"開年"。真係三歲定八十﹐想當年我已經牙尖嘴利最叻駁嘴﹐所以過年通常都俾人ban唔俾亂講嘢。過年另外就係食齋﹐唔知點解我好鬼鍾意去粉嶺某某地方食齋。D白粥同埋個芋頭魚都好正。但係永遠都係果個時間先會諗起去食(其實一年到晚都有齋食)。
其實由細到大都好怕去拜年﹐尤其係去一D唔係好熟嘅親戚屋企。我話晒都係個有錢女﹐我真係麻麻哋想去到老遠又隔涉嘅屋邨拜年。去到又無咩好講﹐尷尷尬尬唔知邊個打邊個。有時D表舅父﹐三叔公呢D真係拜左好多次年都係搞唔清個關係﹐真係到拜山都未識叫。仲有D細路﹐唔知點解永遠都有幾個細路係生面口﹐唔係好認得﹐唔知係表姐個仔﹐定係姑丈果邊D兒甥﹐但係最後都係打交收場。同埋有時一日要走幾場﹐淨係笑都笑都硬。又要拎住一袋二袋籮白糕﹐藍罐曲奇﹐瑞士糖﹐但係每次去到人哋度D親戚又俾多一兩袋拎走。
講到避年我真係不得不提我某家人嘅契爺契媽。每年真係鷄締都無咁準﹐年27-28就一定返大陸/去台灣避年。因為無細路﹐所以結婚咁耐我諗兩父婦係從來無留港過年。其實都無咩所謂﹐好多人都避年﹐好聽D咪叫做趁有假去旅行囉。但係呢兩公婆係好神秘﹐就算你一個星期話約過年前食餐飯(都知佢哋一定出埠)﹐都唔會話俾人知將會唔喺香港﹐寧願等到真係到差唔多過年再打電話去先知無人聽﹐真係好鬼老土。
我仲有其他過年小故事﹐不過手好支力﹐你哋講住先....
-- Tiger姐過肥年 |
|
發表於 2010-2-9 21:36
| 
