口水佬講命運 - 失意與奇蹟

boss2007

我比較幸運，響事業上浮浮沉沉，鬱鬱不得志既日子並唔算太長，hmmm，大概五、六年左右啦。果段日子距離今天已經越黎越遠，不過當時既感受還是記得蠻清楚。

好多成功左既人會同你講：「機會係自己爭取」，又或者甚麼「機會係留俾有準備既人」之類既說話。我當然唔能夠話呢d所謂「名言」係廢話，不過當你失意徬徨既時候，你所面對既現實往往係，我幾咁努力爭取都好，但就硬係爭取唔到我想要既機會；又或者係，大佬，我明明準備好晒啦，但係d機會就硬係唔留俾我，反而留晒俾班冇準備過既二世祖呀！

所謂際遇同命運，大概都係佢玩你既時間居多，你掌握到佢既時間其實甚少。

以前寫過，我老豆係個賭徒，成世人既際遇都大起大落。我事業上最浮浮沉沉果幾年，正值佢又生意失敗面臨破產，不過當時佢同我講左d野，雖然我估佢其實係隨口 up居多，不過後來我又覺得幾受用：「阿仔，你知命運鍾意點樣玩你呀？拿，佢永遠唔會一鋪玩死你架，不過佢會不斷不斷咁打擊你，慢慢咁陰下陰下陰乾你，等你對自己冇晒信心，對呢個世界冇晒希望，等你慢慢相信，你呢一世都唔會有機會翻到身，到時候呢，佢就真係贏左你啦。」

「仔，等我話你知啦，你要贏到命運，一字咁淺，死唔認輸就得架啦。奇蹟總係會響最後關頭出現既。」

同我講呢番話果陣，老豆係個面臨破產，天天俾人上門追債，幾乎仲要禍及妻兒既過街老鼠，呢番說話響當時對我黎講自然係好冇說服力，我覺得佢跌落地想執返渣沙多d囉。不過後來佢又再一次奇蹟地翻身，令到我心裡面又有d唔同既體會。

命運同際遇要贏你既方法，往往唔係要一鋪清你袋，一鑊過收你皮，而係透過恆久不斷既打擊，慢慢磨滅你既心志，令你唔再相信你會有希望，誤以為週圍既環境唔會再容得下你，令你相信你一定鬥佢唔贏。

命運贏你既方法，係折磨到你捱唔住自己選擇扯白旗投降，而唔係一刀統死你。

徬徨失意浮浮沉沉有幾難受，我明既。隨住年紀慢慢大，我開始理解到，呢個世界真正既遊戲規則，其實並唔係去鬥大家到底有幾「叻」，而係鬥大家到底有幾「韌」。鬥韌力既遊戲係一個好難玩既項目，原因係，永遠唔會有人話到俾你聽，你韌力既水平要去到幾多先能夠打贏際遇同命運，而且「打爆機」既「分數」要幾多，每個人都唔同。

唯一可以講既，呢個遊戲既特色係，只要你一日唔主動投降，你依然係未輸。

source @
http://manincentral.blogspot.com/

Prelude

That's what gamblers always say.

rainbow-davie

no. His dad says the right thing.

saotome

boss: 多謝分享，好一句「折磨到你捱唔住自己選擇扯白旗投降，而唔係一刀統死你」…

我唔會投降既！！我要贏！

sheep

boss: 多謝分享，好一句「折磨到你捱唔住自己選擇扯白旗投降，而唔係一刀統死你」…

我唔會投降既！！我要 ...
saotome 發表於 2010-12-3 22:04

    有時要壯士斷臂
留力再戰

habitrailspace

有時要壯士斷臂
留力再戰
sheep 發表於 2010-12-3 22:12

上次賓仔壯士斷腳,都係唔夠上天鬥

habitrailspace

人生好比一齣影話戲

ricrick

命運是...............................................................................對手

雲與清風 可以常擁有 關注共愛不可強求
不強求 不強求 永遠等候 如必需苦楚我承受

#誰會珍惜 當你還擁有 將要逝去總想挽留
想挽留 想挽留看似荒謬 求今天所得永遠守#

*命運是對手 擁不低頭
從來沒抱怨半句 不去問理由
仍踏著前路走青春走到白頭
成功祇有靠一雙手*

命運是對手 擁不低頭
從來沒抱怨半句 不去問理由
仍踏著前路走青春走到白頭
成功祇有靠堅守信心奮鬥*

Nam

呢個世界真正既遊戲規則，其實並唔係去鬥大家到底有幾「叻」，而係鬥大家到底有幾「韌」。

Totally agree!!