抽起趙連海　 TVB事旦做河蟹

http://hk.dv.nextmedia.com/templ ... 14674823&page=1

抽起趙連海　 TVB事旦做河蟹

內地毒奶粉受害家長趙連海被判「尋釁滋事罪」坐監，連本地左派都睇唔過眼，無綫電視卻貫徹河蟹本色，官方網站 tvb.com無故抽走時事節目《變革三十年》訪問趙連海嘅片段，監製區家麟赫然發現心血被河蟹，「心凉了半截」。

監製區家麟網誌揭露

已辭職無綫轉到中大新聞系教書嘅區家麟， 08年有份攝製《變革三十年》一連四集特輯，探討大陸改革開放 30年社會轉變，其中一集〈不走回頭路〉係關於內地司法制度 30年來原地踏步，提及毒奶粉、黑磚窰醜聞等案件，訪問咗趙連海等多名維權人士、律師，佢哋都批評內地司法機構一味打壓老百姓。呢個特輯播出後一直可以喺 tvb.com網頁重溫，區家麟日前卻喺個人網誌透露， tvb.com忽然抽起咗〈不走回頭路〉，其餘三集正常，英文版都冇出事，「我的心當即凉了半截，希望只是我想得太多。如果是巧合，那是很巧合的巧合」。

無綫稱網站整合所致

區家麟同八方講，今年 8月中仍可以在 tvb.com重溫該集節目，「由於趙連海判刑，原本諗住向人介紹睇番呢個節目，點知已經被刪走」。他不揣測事件係咪涉及政治因素，「以往都曾經發生過同類事件，可能因為版權問題，又或者網頁進行更新，有好多可能性」。佢又指 TVB都有報道趙連海被屈新聞，忽然河蟹令人費解，「成件事充滿謎團」。

無綫發言人否認事件涉政治因素，又指節目英文版仍可供重溫，「證明唔係政治原因」，並說 tvb.com網站 9月中開始進行整合，陸續重組內容，日後戲集只可在播出 7日內重溫，其他節目賞味期限 30日，逾期一律刪除。

至於點解四集特輯，只係冇咗涉及趙連海訪問嗰一集呢？發言人話相信係工程人員隨機刪除，冇政治考慮。咁講法，即係求其刪除一集，大家信唔信，可以自行判斷，不過又確係啱數，無綫精神，事事旦旦吖嘛！