|
|
人生有幾個大階段，之前都探討過入大學同出嚟＂搵食＂呢個milestone。對於某部份人嚟講結婚都算係人生不可缺少嘅階段，但係對其他人嚟講，今時今日結唔結婚都唔係好重要。
話說今年真係好多身邊嘅朋友好似趕巴士咁結婚甚至生仔。今日同一個舊同學whatsapp原來６月已經結咗婚，拍拖都唔夠兩年！又有另一個朋友奉子成婚，都係識咗唔係好耐...
究竟結婚嘅人係有咩motivation呢？係咪因爲雙春兼潤月？係咪末日危機？定係前幾年經濟太差等到今年先結呢？
對於傳統思想嘅朋友嚟講，結婚可能係組織家庭嘅一個開始。咁呢個社會亦俾好多incentive去結婚生仔。呢個唔洗講。但係對於我哋呢啲浪子／浪女，唔結婚so what？呢個年頭享受戀愛，同愛得瀟灑嘅人實在太多。結咗婚唔生小朋友，各有各玩，分開兩地居住或工作嘅＂夫婦＂大有人在... 咁究竟結嚟做乜？
一張婚書本來係嚟見證一對夫妻一生嘅承諾，但係偏偏有啲地區離婚數字係高過結婚，咁仲有咩意義？結婚真係對雙方有保障？
曾經聽某女明星講過，起埋一齊十幾年已經係對愛最好嘅證明，而唔係因爲一個contract去夾硬維繫一段婚姻。我好同意，女人叫個男人結婚總有幾百個理由，但講到尾都係想有個名份，想得個安心。但係每次見到呢啲女朋友好擔心同男友拍拖咁耐都唔結，好蝕，萬一有一日被飛人老珠黃點算。我每次個心聲上到喉嚨都吞返落肚。其實要飛你，結咗一樣可以飛。如果你每日都對住一個唔信任嘅男人一齊，喺一個惶恐中生活，不如瀟灑啲，享受現在好過啦！
- 大C姐 |
|
發表於 2012-10-11 15:10
| 
