你都咪話經濟差。
可能呢邊無舊曆新年﹐D人淨係洗錢洗喺christmas同new year個幾禮拜。話說呢幾日同友人吹水講翻new year's eve去左邊倒數。當然我就豪門夜宴啦唔洗講﹐但係仲有一班o靚介蛋散趁熱鬧出去過節。出街天寒地凍唔通好似香港times square同ifc咁街邊逛咩。好多人都同我講去左一D"夜店"count down。
點解我咁強調夜店呢﹐嗱﹐正常new year's eve party就落club(以前我個年代就落D)﹐好普通過普通啦﹐個入場費就通常比平日貴D﹐但係可能又有兩張drink coupon之類(我唔知嘅﹐我去親都唔洗我俾錢)。但係有人報告返嚟俾我聽﹐呢邊D夜場亂咁嚟。平日明明係餐聽﹐pub,cafe無端端charge入場費。如果你當係special event計係OK﹐你係咁依請兩個二打六/出名D嘅DJ再charge人錢入場好合理。但係呢D夜場同平日無分別﹐多左兩個人喺門口check ticket。入場費普遍$35-$50不等﹐通常都無drink coupon﹐仲聽講要預早買定飛唔係去到都入唔到。聽講過最貴既一間pub(喺BC Place出面)竟然收人$125入場費。請個爛鬼魔術師贈慶。佢表演咩我就唔知﹐但係我知佢用十妙count down時間可以變走我舊幾水囉。
再細心拆呢件事。New year's eve 就唔係公眾假期﹐好多人朝早仲要返工。放得工﹐眠個disco nap﹐食完飯﹐化得個妝出得街見人都11點有多啦。count down過後其實同平日無咩分別咋啵﹐仲要驚無的士搭。數果十秒值唔值百幾蚊就見人見智啦。但係你唔好理﹐街外報告話我知出面求其一個場都爆到七彩。可想而知經濟市道絕對影嚮唔到一班爛玩愛蒲嘅蛋散。
-- 過氣D場波后
|
發表於 2009-1-4 01:10
| 
