公主病

網絡公主　病得開心

邊個女仔唔想做公主？有白馬王子追求唔使做就有人養？我係女仔，細個都幻想過做公主，但幻想會隨年紀幻滅。呢一代 20 歲出頭女仔呢？誇到自拍艷照放上網，有網友視呢班患「公主病」女仔為笑柄。你話佢唔知醜？佢不知幾 Happy 。開心，原來真係咁簡單，自稱公主就得，問你服未？

記者：許維雅
攝影：梁細權、楊錦文

虛擬世界建自我

甜甜圈

《新香蕉俱樂部》主持 Ben 同 Bob 好唔話得，笠假髮黐假眼睫毛，模仿小公主膽艷照。影完相，佢語重心長話：「做人應該將自信帶返現實，呢班公主淨係識幻想，最後只會落得被淘汰下場。」佢做節目，晚晚同少女解困，都聽過「公主病」呢個名詞， Ben ：「有六成 14 至 24 歲女仔有公主病病徵，無讀書又唔肯做，返工呻辛苦，做半日工就辭職，又投訴男朋友畀零用錢少，用錢衡量男朋友有幾愛佢。」 Bob ：「父母溺愛係主因，同埋網絡太發達喇，佢根本唔需要同外界溝通。呢班女仔通常外表無咁出眾，成日俾人笑，唯一自豪自信只建立網上世界，現實生活？佢係 Nothing ，即使網上面俾人鬧，佢都搵到自己存在價值。」
社會新一代出現大斷層，價值觀被扭曲，根本積習難返， Ben 認同：「好難從虛擬世界拉番呢班公主返咯，呢個社會變得精英制，一班人肯學肯由低做起，另一班人唔肯做又覺得全世界欠佢。」淨係識發公主夢尋開心，絕對唔係好事，「如果佢可以將自信帶返現實世界就係好事，一個人有自信，永遠係最靚。」

zoom

■ Bob ：「我估，香港大概有六成女仔患公主病，只係輕重問題。」

■ Ben ：「我私校說話技巧，發覺呢一代人連自我介紹能力都無。」

高登網

甜甜圈

現實世界變鵪鶉

■ 何國良

世界尖酸刻薄，網友鍾意評頭品足，網絡世界可以充滿自信，但一返到現實社會，部份公主會自信變自大，部份會自信變自閉。應用社會科學系副授何國良博士又咁睇：「肯自戀，起碼係做人態度一種自我肯定。少女愛發夢係好事，話畀人聽自己靚無罪，如果佢肯踏出一步，企番出現實社會證明自己，咁香港就會好喇。」
點解公主鍾意自戀？「因為佢現實世界面無人讚賞、無能力、無寄託，連同人溝通能力都無，鵪鶉程度好可怕，有人甚至連搭小巴都唔敢開聲嗌落車。其實成班公主匿埋一堆，話就話自得其樂，但自己話自己係公主，根本無意思，因為網絡世界無真假對錯，反而玩 Cosplay 班年輕人，佢份專注同自信，先值得讚賞。」批評公主，已經成為衰仔網友免費娛樂，「大眾慣對少數族群打壓，呢種價值觀好唔要得，批評人之前應該反思美觀念。」