光澤紋死不鳥 巴士, 北京, 大埔

rainbow-davie

京城生態，進化一日千里，變幻莫測，達爾文翻生都冇可能解釋得到。話說今年「七六亞洲事變」，一隻神獸由北京飛到大埔，名為「光澤紋瓜柴鳥」。呢隻高登巴士絲打創造出嚟嘅神獸人見人愛，未經官方證實佢是否存在，國際傳媒已經爭相轉載呢個驚世消息，日本傳媒仲圖文並茂號外報導，瓜柴鳥風頭一時無兩。
點知光澤紋瓜柴鳥好鬼短命，在世只有 18粒鐘，並且極速進化為光澤紋不死鳥（又名光澤紋死不鳥）。呢隻鳥屬於國寶級神鳥，經由北京權威專家證實佢嘅存在。老老實實，無論係瓜柴鳥同不死鳥，黎民百姓都未見過佢哋一面，基本上連談論都唔准。可以咁講，相信呢兩隻神獸，將會連同尼斯湖水怪同珠穆朗瑪峰雪人一樣，永垂不朽。